వైఎస్సార్ నగర్- నందమూరి నగర్ ప్రజలకు సురక్షితంగా రవాణా సౌకర్యం కల్పించేందుకు కట్టుబడి ప్రభుత్వం-రాష్ట్ర మైనారిటీ మరియు న్యాయ శాఖ మంత్రి ఎన్ఎండి ఫరూక్

-కుందూ నది వంతెనను క్షేత్ర స్థాయిలో పరిశీలించిన మంత్రి ఎన్ఎండి ఫరూక్

-వైఎస్సార్ నగర్, నందమూరి నగర్ ప్రజల రాకపోకల సమస్యపై ప్రత్యేక దృష్టి

-అధికారులతో కలిసి బ్రిడ్జి పరిస్థితిపై సమీక్ష ; శాశ్వత పరిష్కారానికి ఆదేశాలు

నంద్యాల అర్బన్:
నంద్యాల పట్టణ పరిధిలోని వైఎస్సార్ నగర్, నందమూరి నగర్‌లకు రాకపోకలు సాగించే నూతన కుందూ నది బ్రిడ్జిని ఆంధ్రప్రదేశ్ రాష్ట్ర న్యాయశాఖ మరియు మైనార్టీ సంక్షేమ శాఖ మంత్రివర్యులు ఎన్ఎండి ఫరూక్ అధికారులతో కలిసి క్షేత్రస్థాయిలో పరిశీలించారు. ఈ ప్రాంత కాలనీల ప్రజలు ప్రతిరోజూ పట్టణంలోకి వచ్చేందుకు ఈ వంతెనే ప్రధాన ఆధారంగా అవుతుందన్నారు. వర్షాకాలంలో కుందూ నది ప్రవాహం పెరిగినప్పుడు, బ్రిడ్జిపై రాకపోకలకు ఎదురవుతున్న ఇబ్బందులను, వంతెన ప్రస్తుత స్థితిగతులను మంత్రి ఫరూక్ స్వయంగా పరిశీలించారు. ఈ సందర్భంగా మంత్రి ఫరూక్ మాట్లాడుతూ వైఎస్సార్ నగర్, నందమూరి నగర్ ప్రజలకు నిరంతరాయంగా, సురక్షితంగా రవాణా సౌకర్యం కల్పించేందుకు ప్రభుత్వం కట్టుబడి ఉందని అన్నారు . బ్రిడ్జి పనులు , పటిష్టత పనులకు సంబంధించి తక్షణమే నివేదిక రూపొందించాలని, అవసరమైన ప్రతిపాదనలు సిద్ధం చేయాలని సంబంధిత ఇంజనీరింగ్ అధికారులను ఆదేశించారు. ప్రజా సమస్యల పరిష్కారంలో నిర్లక్ష్యం వహించకుండా పనులను వేగవంతం చేయాలని సూచించారు.
ఈ కార్యక్రమంలో మున్సిపల్ అధికారులు, సంబంధిత ఇంజనీరింగ్ శాఖల అధికారులు, స్థానిక ప్రజాప్రతినిధులు మరియు కాలనీవాసులు పాల్గొన్నారు.