ఘనంగా డాక్టర్ ఏపీజే అబ్దుల్ కలాం జయంతి వేడుకలు
మార్టూరు, మేజర్ న్యూస్: భారత మాజీ రాష్ట్రపతి, భారతరత్న డాక్టర్ ఏపీజే అబ్దుల్ కలాం జయంతి వేడుకలను రోటరీ క్లబ్ ఆఫ్ మార్టూరు ఆధ్వర్యంలో ఘనంగా నిర్వహించారు. మార్టూరులోని రిటైర్డ్ ఎంప్లాయీస్ యూనియన్ భవనం ఆవరణంలో జరిగిన ఈ కార్యక్రమంలో కలాం చిత్రపటానికి నివాళులర్పించి, దేశానికి ఆయన అందించిన సేవలను స్మరించుకున్నారు.ఈ సందర్భంగా వక్తలు మాట్లాడుతూ, డాక్టర్ అబ్దుల్ కలాం శాస్త్ర సాంకేతిక రంగాల్లో విశేష విజయాలు సాధించడంతో పాటు, యువతలో స్ఫూర్తిని నింపిన మహనీయుడని కొనియాడారు. విద్యార్థులు ఆయన జీవితాన్ని ఆదర్శంగా తీసుకొని, ఉన్నత లక్ష్యాలను నిర్దేశించుకుని, క్రమశిక్షణతో కృషి చేయాలని సూచించారు. దేశాభివృద్ధిలో యువత కీలక పాత్ర పోషించాలని ఆకాంక్షించారు.ఈ కార్యక్రమంలో రోటరీ క్లబ్ ఆఫ్ మార్టూరు అధ్యక్షులు కొర్రపాటి సుబ్రహ్మణ్యం, మాజీ అధ్యక్షులు రావి అంకమ్మ చౌదరి, మాదాల సాంబశివరావు, మద్దుమాల కోటేశ్వరరావు, రోటేరియన్లు చింతల సుబ్బారావు, వి.వి. శేషుబాబు, చల్లగుండ్ల శ్రీనివాసరావు, మోటుపల్లి అంకయ్య, విశ్రాంత ఉద్యోగుల సంఘం అధ్యక్షులు రామారావు పాల్గొన్నారు. విద్యార్థులు మాదాల నందన, షేక్ ఉజమా బేగం, కొర్రపాటి తనుశ్రీ, కొర్రపాటి వెంకట హవిష్ తదితరులు పాల్గొన్నారు.కార్యక్రమం అనంతరం విద్యార్థులకు స్వీట్లు పంపిణీ చేశారు.
