ఘనంగా 93వ చండీ హోమం

జంగారెడ్డిగూడెం, మేజర్ న్యూస్, జంగారెడ్డిగూడెం పట్టణంలో వేంచేసి ఉన్న శ్రీ నూకాలమ్మ అమ్మవారి ఆలయంలో ఆశ్వయుజ పౌర్ణమిని పురస్కరించుకుని 93వ చండీ హోమాన్ని వైభవంగా నిర్వహించారు. ఆలయ శాశ్వత చైర్మన్ డా. రాజాన సత్యనారాయణ (పండు), చైర్మన్ రొంగల నాగేశ్వరరావు, ప్రధాన కార్యదర్శి చిటికెన రాంబాబు ఆధ్వర్యంలో జరిగిన ఈ కార్యక్రమంలో భక్తులు పెద్ద సంఖ్యలో పాల్గొని పూర్ణాహుతి సమర్పించారు.ప్రముఖ ఆధ్యాత్మికవేత్త ఈమని శశికుమార్ శర్మ మాట్లాడుతూ త్వరలో జరగనున్న 100వ చండీ హోమాన్ని శత చండీయాగంగా ఘనంగా నిర్వహించేందుకు ఆలయ కమిటీ ఏర్పాట్లు చేస్తోందన్నారు.

ఈ హోమంలో మందపాటి పార్థసారథి, కోమలి కోటీశ్వరి, రావిపాటి రామకృష్ణ, యశోదరాణి దంపతులతో పాటు పలువురు ఉభయదారులుగా పాల్గొన్నారు. వారికి అమ్మవారి శేషవస్త్రాలు, చిత్రపటాన్ని అందజేసి వేద ఆశీర్వచనాలు చేశారు. అనంతరం అన్నప్రసాద వితరణ నిర్వహించారు. అలాగే ఆలయ కల్యాణ కళావేదిక వద్ద శ్రీ నర్మదా అమృత బాణ లింగేశ్వర స్వామివారికి ఏకవార రుద్రాభిషేకం చేశారు. ఈ కార్యక్రమంలో ఆలయ కమిటీ సభ్యులు, శ్రీ నూకాంబిక మహిళా సేవా బృందం సభ్యులు, భక్తులు పాల్గొన్నారు.

 రిపోర్టర్ కె వి రమణ రావు జంగారెడ్డిగూడెం ఏలూరు జిల్లా,