ఎన్టీపీసీ సింహాద్రిలో సీఐఎస్ఎఫ్ సిబ్బందికి సైబర్ క్రైమ్ అవగాహన కార్యక్రమం
పరవాడ, సెప్టెంబర్ 29, మేజర్ న్యూస్:
ఎన్టీపీసీ సింహాద్రి ప్రాంగణంలో సీఐఎస్ఎఫ్ అధికారులు, సిబ్బందికి సైబర్ క్రైమ్ మరియు సైబర్ మోసాలపై మంగళవారం అవగాహన కార్యక్రమం నిర్వహించారు.
ఈ సందర్భంగా సైబర్ క్రైమ్ టీమ్ అధికారులు సైబర్ మోసాల పట్ల అప్రమత్తంగా ఉండాల్సిన అవసరాన్ని వివరించారు. ముఖ్యంగా ఆన్లైన్ మోసాలు, ఫేక్ లింకులు, ఓటిపిమోసాలు, ఫేక్ కేవైసీ కాల్స్, బ్యాంకింగ్ మోసాలు, సోషల్ మీడియా మోసాలు, డిజిటల్ అరెస్టులు తదితర సైబర్ నేరాలకు గురికాకుండా తీసుకోవాల్సిన జాగ్రత్తలను సీఐఎస్ఎఫ్ అధికారులు, సిబ్బందికి వివరించారు. అనుమానాస్పద లింకులను క్లిక్ చేయకూడదని, ఓటిపి, పిన్,పాస్వర్డ్లు మరియు బ్యాంకు వివరాలను ఎవరికీ వెల్లడించకూడదని సూచించారు.ఈ కార్యక్రమంలో అనకాపల్లి జిల్లా సైబర్ క్రైమ్ & ఐటీ కోర్ ఎస్సై సురేష్ కుమార్, సిబ్బంది మూర్తి, శ్రీధర్, సీఐఎస్ఎఫ్ కమాండెంట్, పరవాడ పోలీస్ స్టేషన్ ఇన్స్పెక్టర్ ఎల్. భాస్కరరావు మరియు ఇతర సిబ్బంది పాల్గొన్నారు.సైబర్ నేరాలపై ప్రతి ఒక్కరూ అవగాహన పెంపొందించుకుని, అనుమానాస్పద ఆన్లైన్ కార్యకలాపాల పట్ల అప్రమత్తంగా ఉండాలని ఈ సందర్భంగా సూచించారు. సైబర్ మోసానికి గురైన వెంటనే ఆలస్యం చేయకుండా 1930 సైబర్ క్రైమ్ హెల్ప్లైన్కు సమాచారం అందించాలని తెలిపారు.కార్యక్రమం అనంతరం సీఐఎస్ఎఫ్ కమాండెంట్ సైబర్ క్రైమ్ టీమ్ సభ్యులను మరియు పరవాడ ఇన్స్పెక్టర్ ఎల్. భాస్కరరావును జ్ఞాపికలతో సత్కరించారు.
