ఎంపీటీసీ ఎన్నికల్లో సత్తా చాటిన వైసిపి నేతలు

నెేటి దినపత్రిక సూర్య బ్యూరో రాజమహేంద్రవరం  స్థానిక సంస్థల ఎన్నికల్లో ప్రజాభిమానంతో ఘన విజయం సాధించిన వైసీపీ ఎంపీటీసీ అభ్యర్థులకు ఎమ్మెల్సీ తోట త్రిమూర్తులు అభినందనలు తెలియజేశారు. విజయం సాధించిన అభ్యర్థులు పార్టీ నాయకులు, కార్యకర్తలతో కలిసి ఎమ్మెల్సీని మర్యాదపూర్వకంగా కలిశారు. ఈ సందర్భంగా విజేతలను శాలువాలతో ఘనంగా సత్కరించి అభినందించారు. మండపేట రూరల్ పరిధిలోని పాలతోడు గ్రామం నుంచి చంద్రమల్ల శ్రీనివాస్ 62 ఓట్ల మెజారిటీతో విజయం సాధించారు. గ్రామ వైసీపీ అధ్యక్షుడు పిల్లా అరవరాజు, పలువురు పార్టీ నాయకులతో కలిసి ఆయన ఎమ్మెల్సీ తోటను కలిశారు. అదేవిధంగా వెలగతోడు నుంచి నిచ్చెనకోళ్ల రమణ 22 ఓట్ల మెజారిటీతో విజయం సాధించి, ఈదల వీరాస్వామి ఆధ్వర్యంలో ఎమ్మెల్సీని మర్యాదపూర్వకంగా కలిశారు. జెడ్. మేడపాడు నుంచి కె ఆదిలక్ష్మి 69 ఓట్ల ఆధిక్యంతో, పసలపూడి-1 నుంచి కొల్లి హనుమాన్ ప్రసాద్ 371 ఓట్ల భారీ మెజారిటీతో, పసలపూడి-2 నుంచి చింతా రామ్మోహన్ రెడ్డి 503 ఓట్ల ఘన మెజారిటీతో విజయం సాధించారు. ఈ సందర్భంగా ఎమ్మెల్సీ మాట్లాడుతూ ఎన్నికల్లో సాధించిన విజయం ప్రజలు తమపై ఉంచిన నమ్మకానికి, విశ్వాసానికి నిదర్శనమని పేర్కొన్నారు. ప్రజాప్రతినిధులుగా పదవులు అలంకారప్రాయంగా కాకుండా బాధ్యతతో కూడుకున్నవని గుర్తుంచుకోవాలని సూచించారు. గ్రామీణ ప్రాంతాల్లో ప్రజలు ఎదుర్కొంటున్న సమస్యలను గుర్తించి, వాటి పరిష్కారానికి కృషి చేయాలని, మౌలిక సదుపాయాల కల్పనకు ప్రాధాన్యతనిస్తూ ప్రజలకు నిరంతరం అందుబాటులో ఉండాలని హితవు పలికారు. ప్రజల ఆశయాలకు అనుగుణంగా పనిచేస్తూ గ్రామాల అభివృద్ధికి అంకితభావంతో కృషి చేయాలని విజేతలకు సూచించారు. కార్యక్రమంలో వైసీపీ రాష్ట్ర కార్యదర్శి కర్రి పాపారాయుడు, నాయకులు దేవు శ్రీనివాస్ నాయుడు, వాసిరెడ్డి అర్జున్, అడబాల బాబ్జి, పోతంశెట్టి సత్యనారాయణ రెడ్డి, తోరం శ్రీనివాస్, గెడ్డం గాంధీబాబు తదితరులు పాల్గొన్నారు.