ఎమ్మెల్యే ఏలూరి చొరవతో బాధితుడికి సీఎంఆర్ఎఫ్‌ నుంచి రూ.45 వేల సాయం
పర్చూరు, మేజర్‌న్యూస్‌ :
రోడ్డు ప్రమాదంలో కాలు విరిగి మంచానికే పరిమితమైన నిరుపేదకు ఎమ్మెల్యే ఏలూరి సాంబశివరావు అండగా నిలిచారు. ఆయన చొరవతో ముఖ్యమంత్రి సహాయ నిధి (సీఎంఆర్ఎఫ్‌) నుంచి బాధితుడికి రూ.45 వేల విలువైన లెటర్‌ ఆఫ్‌ క్రెడిట్‌ (ఎల్‌ఓసీ) మంజూరైంది. పర్చూరు మండలం దేవరపల్లి గ్రామానికి చెందిన పాలతోటి వెంకటేశ్వర్లు ఇటీవల రోడ్డు ప్రమాదంలో గాయపడ్డారు. ఈ ఘటనలో ఆయన కాలు ఫ్రాక్చర్‌ కావడంతో మంచానికే పరిమితమయ్యారు. మధ్యతరగతి కుటుంబానికి చెంది వ్యవసాయ పనులు చేసుకుంటూ జీవనం సాగించే కుటుంబానికి వైద్య ఖర్చులు భారంగా మారాయి. ఈ పరిస్థితుల్లో బాధిత కుటుంబం తమ సమస్యను ఎమ్మెల్యే ఏలూరి సాంబశివరావు క్యాంపు కార్యాలయం దృష్టికి తీసుకెళ్లింది. బాధితుడి పరిస్థితిని తెలుసుకున్న ఎమ్మెల్యే ఏలూరి వెంటనే స్పందించి, ముఖ్యమంత్రి సహాయ నిధి ద్వారా ఆర్థిక సాయం అందేలా చర్యలు చేపట్టారు. ఆయన సిఫార్సుతో సీఎంఆర్ఎఫ్‌ నుంచి రూ.45 వేల ఎల్‌ఓసీ మంజూరైంది. గుంటూరు కొత్తపేటలోని నుహా ఆసుపత్రిలో బాధితుడికి అవసరమైన వైద్యం అందించాలని ఆసుపత్రి డైరెక్టర్‌ను కోరారు. ఆపద సమయంలో తమ సమస్యను గుర్తించి వైద్య సాయం అందేలా కృషి చేసిన ఎమ్మెల్యే ఏలూరి సాంబశివరావుకు, ముఖ్యమంత్రి చంద్రబాబునాయుడుకు బాధిత కుటుంబ సభ్యులు కృతజ్ఞతలు తెలిపారు. స్థానిక నేతలు బాధితుడి కుటుంబానికి అందజేశారు.
