ఎల్.కోటలో ప్రశాంతంగా ముగిసిన ఎంపీటీసీ, జడ్పీటీసీ ఎన్నికలు!

లక్కవరపుకోట, సూర్య : లక్కవరపుకోట మండలంలో ఎంపీటీసీ, జడ్పీటీసీ ఎన్నికలు ప్రశాంతంగా ముగిశాయి. మండలవ్యాప్తంగా 83.83 శాతం పోలింగ్ నమోదైనట్లు ఎన్నికల అధికారులు వెల్లడించారు. మండలంలోని 31 గ్రామ పంచాయతీల పరిధిలో ఉన్న 40 గ్రామాలకు సంబంధించి మొత్తం 53 పోలింగ్ కేంద్రాలను ఏర్పాటు చేసి ఎన్నికల నిర్వహణ చేపట్టారు.
అక్కడక్కడా చెదురుమదురు సంఘటనలు చోటుచేసుకున్నప్పటికీ, పోలీసులు వెంటనే స్పందించి పరిస్థితులను అదుపులోకి తీసుకువచ్చారు. చందులూరు, వీరభద్రపేట గ్రామాల్లో ఇరువర్గాల మధ్య ఘర్షణ చోటుచేసుకోవడంతో సమాచారం అందుకున్న ఎల్.కోట ఎస్‌ఐ పోలీసు సిబ్బందితో అక్కడికి చేరుకుని పరిస్థితిని సమీక్షించారు. ఇరువర్గాలకు నచ్చజెప్పి సమస్యను సద్దుమణిగేలా చేశారు. గతంలో ఎన్నడూ లేనివిధంగా ఈసారి ఎన్నికలను అధికారులు సీసీ కెమెరాల నిఘా నీడలో పటిష్ట భద్రతా ఏర్పాట్ల మధ్య నిర్వహించారు. ఎక్కడా ఎలాంటి పొరపాట్లకు తావులేకుండా పోలింగ్ సిబ్బంది అప్రమత్తంగా విధులు నిర్వహించారు. ఓటర్లు సైతం ఉత్సాహంగా తమ ఓటు హక్కును వినియోగించుకున్నారు. ఎన్నికల ప్రక్రియ ముగియడంతో అభ్యర్థుల భవితవ్యం బ్యాలెట్ బాక్సుల్లో భద్రంగా నిక్షిప్తమైంది. ఇక ఫలితాల కోసం అభ్యర్థులు, రాజకీయ పార్టీల నాయకులు, కార్యకర్తల్లో ఉత్కంఠ నెలకొంది.