ఎకరానికి రూ 70 వేలు నష్టపరిహారం చెల్లించాలి

నేటి దినపత్రిక సూర్య బ్యూరో రాజమహేంద్రవరంఆర్నాబ్ తుఫాన్ ప్రభావంతో తీవ్రంగా నష్టపోయిన అరటి రైతులను ప్రభుత్వం తక్షణమే ఆదుకోవాలని శాసనమండలి సభ్యులు వంక రవీంద్రనాథ్ డిమాండ్ చేశారు. గురువారం పెరవలి మండలంలోని ఖండవల్లి, ముక్కామల, కాకరపర్రు తదితర గ్రామాల్లో ఆయన పర్యటించారు. తుఫాన్ ధాటికి దెబ్బతిన్న అరటి తోటలను పరిశీలించి, రైతులతో మాట్లాడి పంట నష్టం వివరాలను అడిగి తెలుసుకున్నారు.ఈ సందర్భంగా ఎమ్మెల్సీ వంక రవీంద్రనాథ్ మాట్లాడుతూ పెరవలి మండలంలోని గోదావరి పరివాహక ప్రాంతాల్లో ఎక్కువగా చిన్న, సన్నకారు రైతులు భూములను కౌలుకు తీసుకుని అరటి పంటను సాగు చేస్తున్నారని తెలిపారు.అప్పులు చేసి, అధిక కౌలు చెల్లించి, వేలాది రూపాయల పెట్టుబడితో సాగు చేసిన అరటి తోటలు తుఫాన్ ధాటికి నేలకొరిగిపోవడంతో రైతులు తీవ్ర ఆర్థిక సంక్షోభంలో చిక్కుకున్నారని ఆవేదన వ్యక్తం చేశారు.ఆరుగాలం శ్రమించి పంట చేతికొచ్చే సమయానికి ప్రకృతి వైపరీత్యాలు రైతులను కోలుకోలేని దెబ్బ తీస్తున్నాయని అన్నారు.తుఫాన్ కారణంగా నష్టపోయిన అరటి రైతులకు ప్రభుత్వం కనీసం ఎకరానికి రూ.70 వేల చొప్పున నష్టపరిహారం చెల్లించాలని డిమాండ్ చేశారు.గతంలో సంభవించిన ప్రకృతి వైపరీత్యాల సమయంలో కూడా ఈ ప్రాంత రైతులకు తగిన సహాయం అందలేదని గుర్తుచేశారు. కనీసం ఈసారైనా ప్రభుత్వం రైతుల పరిస్థితిని అర్థం చేసుకుని సకాలంలో ఆదుకోవాలని కోరారు.