andhrapradesh
ఏజెన్సీలో 50 శాతానికి పైగా స్థానాల్లో పోటీ
అరకు (ఏజెన్సీ): అల్లూరి సీతారామరాజు జిల్లా అరకులో జనసేన పార్టీ కీలక సమావేశం అత్యంత ఉత్సాహపూరిత వాతావరణంలో జరిగింది. ఈ సమావేశంలో పార్టీ ఎమ్మెల్సీ కొణిదెల నాగబాబు ముఖ్య అతిథిగా పాల్గొని, పార్టీ శ్రేణులకు దిశానిర్దేశం చేశారు.
ఈ సందర్భంగా ఆయన మీడియాతో మాట్లాడుతూ... ఏజెన్సీ ప్రాంతాలపై జనసేన పార్టీకి ప్రత్యేక అనుబంధం ఉందని స్పష్టం చేశారు. రాబోయే ఎన్నికల్లో ఏజెన్సీ పరిధిలోని 50 శాతానికి పైగా స్థానాల్లో తమ పార్టీ అభ్యర్ధులను బరిలో నిలుపుతామని ప్రకటించారు. ఇప్పటికే దీనికి సంబంధించి సమర్థులైన అభ్యర్థులను సిద్ధం చేస్తున్నట్లు తెలిపారు.
గిరిజనులు ఎదుర్కొంటున్న సమస్యలు, కష్టాలను శాశ్వతంగా పరిష్కరించే దిశగా జనసేన పార్టీ నిరంతరం కృషి చేస్తుందని నాగబాబు భరోసా కల్పించారు. ఉప ముఖ్యమంత్రి, జనసేనాని పవన్ కల్యాణ్ ఏజెన్సీ ప్రాంతాల అభివృద్ధి కోసం ప్రత్యేక ప్రణాళికలతో ముందుకు వెళ్తున్నారని, గిరిజన ప్రాంతాల సర్వతోముఖాభివృద్ధే లక్ష్యంగా అడుగులు వేస్తున్నారని కొనియాడారు.
ఈ సమావేశంలో స్థానిక జనసేన పార్టీ కేడర్, నాయకులు భారీ సంఖ్యలో పాల్గొని పార్టీ బలోపేతంపై చర్చించారు.
