ఈ అద్భుత విజయం మీదే.. ఎప్పటికీ మీ శిష్యులమే!

నెల్లూరు రూరల్,  మేజర్ న్యూస్ :    ఎన్నికల్లో విజయం సాధించిన ఆనందంలోనూ తమ రాజకీయ గురువును మరువకుండా నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డిని కలుసుకుని ఆయన ఆశీర్వాదం తీసుకున్నారు చిన్న మస్తాన్, ఆయన సతీమణి అభిబున్నిస్సా. ఎమ్మెల్యే కోటంరెడ్డి శ్రీధర్ రెడ్డి పాదాలకు నమస్కరించి ఆశీర్వాదం తీసుకున్న ఈ దృశ్యం రాజకీయ వర్గాల్లో చర్చనీయాంశంగా మారింది.

సంబంధిత డివిజన్‌లో టీడీపీ రెబల్ అభ్యర్థిగా బరిలోకి దిగిన చిన్న మస్తాన్, తెలుగుదేశం పార్టీ అభ్యర్థి సాబీర్ ఖాన్ సతీమణి గౌసియా బేగంపై 570 ఓట్ల మెజారిటీతో విజయం సాధించారు. ఎన్నికల బరిలో ప్రత్యర్థిగా నిలిచినప్పటికీ, తన రాజకీయ ప్రయాణంలో కోటంరెడ్డి శ్రీధర్ రెడ్డి పాత్రను గుర్తు చేసుకుంటూ ఆయనను కలిసి కృతజ్ఞతలు తెలిపారు.

ఈ సందర్భంగా చిన్న మస్తాన్ దంపతులు తమ విజయాన్ని ఎమ్మెల్యేకు అంకితం చేస్తూ, “ఈ అద్భుత విజయం మీదే.. ఎప్పటికీ మీ శిష్యులమే.. గెలిచినా, ఓడినా మీ వెంటే ఉంటాం” అన్న భావనను వ్యక్తం చేశారు. రాజకీయాల్లో గెలుపోటములు సహజమని, తమ అనుబంధం మాత్రం ఎప్పటికీ కొనసాగుతుందని చాటిచెప్పారు.