డిజిటల్ యుగంలోనూ గ్రంథాలయాల ప్రాధాన్యతను చాటిన విద్యార్థులు జాతీయ గ్రంథాలయ వారోత్సవాల్లో భాగంగా వ్యాసరచన పోటీ నిర్వహణ
రేపల్లె మేజర్ న్యూస్;
విద్యార్థుల్లో పఠనాసక్తిని పెంపొందించడంతోపాటు గ్రంథాలయాల ప్రాధాన్యత, విజ్ఞాన సముపార్జనపై అవగాహన కల్పించేందుకు శ్రీ ఏ.బి.ఆర్. ప్రభుత్వ డిగ్రీ కళాశాల (స్వయంప్రతిపత్తి), రేపల్లెలో జాతీయ గ్రంథాలయ వారోత్సవాల్లో భాగంగా సోమవారం వ్యాసరచన పోటీ నిర్వహించారు. ఈ సందర్భంగా డిజిటల్ యుగంలో గ్రంథాలయాల పాత్ర అనే అంశంపై విద్యార్థులకు పోటీ నిర్వహించి వారి ఆలోచనా శక్తిని, సృజనాత్మకతను వెలికితీసే ప్రయత్నం చేశారు. కళాశాల ప్రిన్సిపాల్ డాక్టర్ టి.సి. రవిచంద్ర కుమార్ మార్గదర్శకత్వంలో గ్రంథాలయ శాస్త్ర విభాగ ఇన్ఛార్జి డాక్టర్ ఎం. దాసు, సహాయ సిబ్బంది పి. సునీత ఈ కార్యక్రమాన్ని నిర్వహించారు. ఈ పోటీలో విద్యార్థులు ఉత్సాహంగా పాల్గొని డిజిటల్ యుగంలో గ్రంథాలయాల ప్రాముఖ్యత, ఆన్లైన్ వనరుల వినియోగం, డిజిటల్ పఠనం, సమాచార సేకరణలో గ్రంథాలయాల పాత్ర వంటి అంశాలపై తమ అభిప్రాయాలను వ్యాసాల రూపంలో వ్యక్తపరిచారు.మారుతున్న సాంకేతిక పరిజ్ఞానానికి అనుగుణంగా గ్రంథాలయాలు కూడా ఆధునిక రూపాన్ని సంతరించుకుంటున్నాయని, పుస్తక పఠనంతోపాటు డిజిటల్ సమాచార వనరులు విద్యార్థుల విజ్ఞానాభివృద్ధికి ఎంతగానో దోహదపడుతున్నాయని ఈ కార్యక్రమం ద్వారా వివరించారు.విద్యార్థుల్లో పఠన సంస్కృతిని పెంపొందించడంతోపాటు పరిశోధనాత్మక దృక్పథం, సృజనాత్మక ఆలోచనా విధానం, విజ్ఞాన సముపార్జన పట్ల ఆసక్తిని పెంపొందించడమే ఈ పోటీ ప్రధాన ఉద్దేశమని తెలిపారు.