*డి-లిమిటేషన్ ప్రచురణ కాపీ విడుదల..* *35 నుండి 44 వార్డులకు విస్తరణ..* *ప్రచురణ ఫారం-1 కాపీని విడుదల చేసిన కమిషనర్ కిరణ్ కుమార్..*

పాలకొల్లు సూర్య న్యూస్  పట్టణం గత 8 ఏళ్లుగా ఎదురుచూస్తున్న మునిసిపల్ ఎన్నికలకు సంబంధించి న్యాయస్థానం నుండి తీర్పు రావడం, ప్రభుత్వం నుండి జీవో వెలువడటంతో పురపాలక సంఘం ఎన్నికలకు రంగం సిద్ధమైంది. పురపాలక సంఘం చుట్టుపక్కల ఉన్నటువంటి విలీన గ్రామాలకు ఎట్టకేలకు ఉపశమనం కలిగింది.  గతంలో 31 వార్డులుగా ఉన్నటువంటి పురపాలక సంఘం పాలకొల్లు మండలం పాలకొల్లు రూరల్, పూలపల్లి, భగ్గేశ్వరం, ఉల్లంపర్రు,   వరిధనం, ఎలమంచిలి మండలం అడవిపాలెం, కొంతేరు గ్రామాలను విలీనం చేస్తూ 35 వార్డులుగా విస్తరించడం జరిగింది. ఒక గ్రామానికి సంబంధించి హైకోర్టును ఆశ్రయించడంతో గత ఏడేళ్లుగా ఎన్నికలు జరగకపోగా ఈ గ్రామాలన్ని ఎటువంటి అభివృద్ధికి నోచుకోలేదు. కూటమి ప్రభుత్వం అధికారంలోకి వచ్చిన తరువాత ప్రజా పరిపాలన కొనసాగించే విధంగా చర్యలు తీసుకొనడంతో ఎట్టకేలకు గౌరవ ఆంధ్ర ప్రదేశ్ హైకోర్ట్ వారి ఉత్తర్వులతో  మార్గం సుగుమం అయినది. దీనికి సంబంధించి మున్సిపల్ కమిషనర్ డి. కిరణ్ కుమార్ పురపాలక సంఘ పరిధిలోని  వార్డుల డి-లిమిటేషన్ ప్రచురణ ఫారం-1 కాపీని  గురువారం మీడియాకు విడుదల చేశారు. 35 వార్డుల నుండి 44 వార్డులుగా పునర్విభజన చేసినట్లు కమిషనర్ పేర్కొన్నారు. జీవో ఎంఎస్ నెంబర్ 64 తేదీ 24-03- 2026 మున్సిపల్ అడ్మినిస్ట్రేషన్ మరియు అర్బన్ డెవలప్మెంట్ ప్రకారం, కమిషనర్ అండ్ డైరెక్టర్ ఆఫ్ మున్సిపల్ అడ్మినిస్ట్రేషన్ ఎలక్ట్టోరల్ రోల్స్ ఆధారంగా  అక్టోబర్ 6న విడుదల చేసిన జీవో ప్రకారం 35 వార్డుల నుండి 44 వార్డులకు పునర్విభజన చేసినట్లు దీనికి సంబంధించి ఈ నెల 14వ తేదీ లోపు అభ్యంతరాలు స్వీకరిస్తామని కమిషనర్ డి. కిరణ్ కుమార్ మీడియా ద్వారా పురజనులకు వెల్లడించారు. గురువారం నుండి పబ్లిక్ నోటీస్ ఏర్పాటు చేసినట్లు కమిషనర్ తెలియజేశారు.