ధర్మవరం చెరువు ఆక్రమణలను తొలగిస్తాం రాష్ట్ర మంత్రి సత్య కుమార్ యాదవ్
ధర్మవరం చెరువును చారిత్రక, సహజ స్వరూపాన్ని కాపాడుతూ ఆధునిక సౌకర్యాలతో అద్భుతమైన లేక్ఫ్రంట్గా అభివృద్ధి చేయనున్నట్లు రాష్ట్ర వైద్య, ఆరోగ్య శాఖ మంత్రి, ధర్మవరం ఎమ్మెల్యే సత్యకుమార్ యాదవ్ తెలిపారు.
ఎస్పీఏ విజయవాడ బృందంతో నిర్వహించిన సమీక్షలో మంత్రి మాట్లాడుతూ చెరువును ఆక్రమణలు, మురుగునీటి నుంచి రక్షించి, నీటి శుద్ధితో పునరుజ్జీవింపజేస్తామన్నారు. సుమారు 16 కిలోమీటర్ల వాక్వే, జాగింగ్, సైకిల్ ట్రాక్లు, పచ్చదనం, లైటింగ్, బోటింగ్, పార్కులు, యాంఫిథియేటర్ తదితర సౌకర్యాలు కల్పించేలా ప్రణాళిక రూపొందిస్తున్నట్లు చెప్పారు.
ధర్మవరం చేనేత, స్థానిక కళలు, చారిత్రక వారసత్వానికి ప్రత్యేక ప్రాధాన్యం ఇవ్వనున్నట్లు తెలిపారు. డీపీఆర్ పూర్తయిన అనంతరం కేంద్ర ప్రభుత్వ ‘అర్బన్ ఛాలెంజ్’ ద్వారా నిధులు సాధించేందుకు ప్రయత్నిస్తామని, ప్రాజెక్టు వ్యయం ప్రాథమికంగా రూ.100–150 కోట్ల వరకు ఉండవచ్చని మంత్రి వెల్లడించారు.
