దేవరపల్లిలో జాతీయ రహదారిపై వరద ప్రవాహాన్ని పరిశీలించిన జిల్లా కలెక్టర్ కీర్తి చేకూరి, ఎస్పి నరసింహ కిషోర్

దేవరపల్లి,  మేజర్ న్యూస్:మురుసు తుఫాను ప్రభావంతో దేవరపల్లి జాతీయ రహదారి డైమండ్ జంక్షన్ వద్ద ఏర్పడిన వరద ప్రవాహ పరిస్థితులను జిల్లా కలెక్టర్ కీర్తి చేకూరి క్షేత్రస్థాయిలో పరిశీలించారు. బుధవారం జిల్లా ఎస్పీ డి. నరసింహ కిషోర్, జాయింట్ కలెక్టర్ వై. మేఘా స్వరూప్‌లతో కలిసి ఆమె రహదారిపైకి చేరుకున్న వరద ఉద్ధృతిని, వాహనాల రాకపోకలను సమీక్షించారు.
ఈ సందర్భంగా మార్గమధ్యంలో వెళ్తున్న వాహనదారులు, ప్రయాణికులతో కలెక్టర్ నేరుగా మాట్లాడారు. ప్రయాణికులు అత్యంత అప్రమత్తంగా, జాగ్రత్తగా ప్రయాణించాలని సూచించారు. వరద నీరు వేగంగా ప్రవహిస్తున్న ప్రాంతాలు, కాజ్‌వేల వద్ద అనవసరంగా ప్రయాణించి ప్రమాదాల బారిన పడవద్దని విజ్ఞప్తి చేశారు. క్షేత్రస్థాయిలో ఉన్న అధికారులు, పోలీసు సిబ్బంది సూచనలను ఖచ్చితంగా పాటిస్తూ సురక్షితంగా తమ గమ్యస్థానాలకు చేరుకోవాలని కలెక్టర్ విజ్ఞప్తి చేశారు.