దారి తప్పిన వృద్ధురాలు.. క్షేమంగా చేర్చిన పోలీసులు!

గాజువాక, సూర్య : రోడ్డుపై దిక్కుతోచని స్థితిలో కనిపించిన 70 ఏళ్ల వృద్ధురాలిని స్టీల్‌ప్లాంట్‌ పోలీసులు చేరదీసి, మానవతా దృక్పథంతో గంటల వ్యవధిలోనే కుటుంబ సభ్యుల చెంతకు చేర్చారు. పోలీసులు తెలిపిన వివరాల ప్రకారం... స్టీల్‌ప్లాంట్‌ పీఎస్‌ పరిధిలో సిబ్బంది మంగళవారం వాహనాల తనిఖీలు చేపట్టారు. ఆ సమయంలో ఓ వృద్ధురాలు రోడ్డుపై ఒంటరిగా నడుచుకుంటూ వెళ్తుండటాన్ని సిబ్బంది గమనించారు. వెంటనే ఆమెను ఆపి వివరాలు అడగ్గా, ఇంటి నుంచి బయటకు వచ్చి తిరుగు ప్రయాణంలో దారి మరిచిపోయినట్లు తెలిసింది. వయసు పైబడటంతో తన ఇంటి చిరునామా కూడా ఆమె స్పష్టంగా చెప్పలేకపోయారు. దీంతో సిబ్బంది ఆమెను స్టేషన్‌కు తీసుకొచ్చి ధైర్యం చెప్పారు. అనంతరం ఆమె చెప్పిన కొద్దిపాటి వివరాల ఆధారంగా సోషల్‌ మీడియా ద్వారా ఆరా తీసి, కుటుంబ సభ్యుల ఆచూకీ కనుగొన్నారు. వెంటనే ఆమె కుమారుడికి సమాచారం అందించి స్టేషన్‌కు పిలిపించి, వృద్ధురాలిని క్షేమంగా అప్పగించారు. సమయానికి స్పందించి తన తల్లిని చేరదీసిన పోలీసులకు ఈ సందర్భంగా కుమారుడు కృతజ్ఞతలు తెలిపారు.

రిపోర్టర్ : కోటి రెడ్డి, గాజువాక, విశాఖపట్నం.