భర్త మరణంతో కష్టాల్లో ఉన్న కుటుంబానికి రూ.2 లక్షల బీమా సాయం

బ్యాంకు ఖాతాలో జమ చేసిన ఆంధ్రప్రదేశ్ గ్రామీణ బ్యాంకు

మాకవరపాలెం, నవంబర్ 12, మేజర్ న్యూస్:

భర్తను కోల్పోయి ఆర్థిక ఇబ్బందులు ఎదుర్కొంటున్న ఓ మహిళకు ప్రధానమంత్రి జీవన్ జ్యోతి బీమా యోజన (పీఎంజేజేబీవై) పథకం ద్వారా రూ.2 లక్షల బీమా సాయం అందింది. మాకవరపాలెం మండలం దుంగవానిపాలెం గ్రామానికి చెందిన దుంగల రమణమ్మ భర్త అప్పలనాయుడు ప్రమాదవశాత్తు మరణించారు. ఈ క్రమంలో గ్రామంలో ఎస్.ఎస్.టి. ఆర్థిక అక్షరాస్యత కేంద్రం కౌన్సిలర్లు వరలక్ష్మి, నారాయణమూర్తి, దుర్గాదేవి నిర్వహించిన అవగాహన సమావేశంలో ఆమె పాల్గొన్నారు. ముఖ్య అతిథిగా హాజరైన ఆంధ్రప్రదేశ్ గ్రామీణ బ్యాంకు మేనేజర్ ప్రశాంత్‌కు తన భర్త మరణించిన విషయాన్ని తెలియజేశారు. ఈ సందర్భంగా కౌన్సిలర్లు బ్యాంకింగ్, సామాజిక భద్రతా పథకాలు, డిజిటల్ బ్యాంకింగ్, ఆన్‌లైన్ మోసాలు, ప్రైవేటు ఆర్థిక సంస్థల మోసాలపై అవగాహన కల్పించారు. అటల్ పెన్షన్ యోజన, సుకన్య సమృద్ధి యోజన, రిజర్వ్ బ్యాంక్ అంబుడ్స్‌మన్, క్లెయిమ్ చేయని డిపాజిట్ల గురించి వివరించారు. పీఎంఎస్‌బీవై, పీఎంజేజేబీవై బీమా పథకాల ప్రయోజనాలను తెలియజేశారు. పీఎంఎస్‌బీవైకి ఏడాదికి రూ.20, పీఎంజేజేబీవైకి ఏడాదికి రూ.436 ప్రీమియం చెల్లిస్తే, అర్హత నిబంధనల మేరకు బీమా ప్రయోజనాలు పొందవచ్చని వివరించారు. రమణమ్మ తన భర్త బ్యాంకు పాస్‌బుక్‌ను చూపించడంతో ఆంధ్రప్రదేశ్ గ్రామీణ బ్యాంకు రాచపల్లి శాఖలో ఖాతా వివరాలను పరిశీలించారు. ఆమె భర్త ఖాతాకు పీఎంజేజేబీవై బీమా ఉందని మేనేజర్ ప్రశాంత్ గుర్తించి, బీమా క్లెయిమ్‌కు దరఖాస్తు చేయించారు. దీంతో నామినీ అయిన రమణమ్మ ఖాతాలో రూ.2 లక్షల బీమా సొమ్ము జమ అయింది. ఈ మొత్తాన్ని వ్యవసాయం, పిల్లల చదువులు, కుటుంబ అభివృద్ధికి వినియోగించుకుంటానని ఆమె తెలిపారు. తమకు బీమా పథకం ఉందనే విషయం తెలియదని, ఆర్థిక అక్షరాస్యత సమావేశం ద్వారా విషయం తెలుసుకుని ప్రయోజనం పొందగలిగానని రమణమ్మ ఆనందం వ్యక్తం చేశారు. ఈ సహాయం అందించిన బ్యాంకు మేనేజర్ ప్రశాంత్‌తో పాటు ఎస్.ఎస్.టి. ఆర్థిక అక్షరాస్యత కేంద్రం ప్రాజెక్టు డైరెక్టర్ వి. ఆంజనేయులు, ప్రాజెక్టు మేనేజర్ వి. అశోక్ కుమార్, కౌన్సిలర్లు వరలక్ష్మి, నారాయణమూర్తి, దుర్గాదేవికి ప్రత్యేక కృతజ్ఞతలు తెలిపారు.