భారత్‌తో వాణిజ్య సంబంధాలకు విదేశీ విద్యార్ధులు దోహదం
విశాఖ ఎడ్యుకేషన్, సూర్య : భారత దేశంతో వాణిజ్య సంబంధాలకు ఇతర దేశాల నుంచి విద్యాభ్యాసం కోసం విశాఖ ఇతర ప్రాంతాలకు వచ్చిన విదేశీ విద్యార్ధులు సహితం ముందుకు రావచ్చునని, ఔత్సాహిక పారిశ్రామిక వేత్తలుగా మారవచ్చునని విశాఖ ప్రాంతీయ పాస్‌పోర్టు అధికారి డాక్టర్ ఎస్.చవాన్ సూచించారు. గీతం డీమ్డ్ విశ్వవిద్యాలయంలోని విదేశీ విద్యార్ధులతో మంగళవారం జరిగిన ముఖాముఖి కార్యక్రమంలో ఆయన పాల్గొన్నారు. భారత దేశంలోని పర్యాటక ప్రాంతాలు, తక్కువ వ్యయం అయ్యే వైద్య సేవలు, ఉన్నత విద్య, ఆహర ప్రాసెసింగ్ పరిశ్రమలు విదేశీయులను విశేషంగా ఆకర్షిస్తున్నాయని ఆయన పేర్కొన్నారు. విశాఖ నగరం సహితం మెడికల్ టూరిజం, ఉన్నత విద్య అభ్యాసానికి అనువైన కేంద్రంగా మారుతోందని ఆయన తెలిపారు. విదేశీ విద్యార్ధులు తమ దేశాలలోని వాణిజ్య అవసరాలను గుర్తించి ఇక్కడ చదువుకునే సమయంలోనే ఎగుమతి, దిగుమతి దారులుగా మారాలని అందుకు తగిన ప్రోత్సాహకాన్ని మార్గదర్శకాన్ని తాము అందిస్తామని ఆయన తెలిపారు. భారత దేశంలో పర్యాటక ప్రాంతాలను సందర్శించి తమ దేశంలోని పర్యాటకులకు పరిచయం చేయడం కూడా ఒక ఉపాధి మార్గంగా మలుచుకోవచ్చునన్నారు. అలాగే వారి దేశాలలోని వాణిజ్య అవసరాలపై ప్రాజెక్టు రిపోర్టు రూపొందించుకుని భారతదేశంలోని ప్రభుత్వ విభాగాల ద్వారా ఎగుమతి వాణిజ్యంపై అనుభవాన్ని పొందవచ్చునన్నారు. విదేశీ విద్యార్ధులకు అవసరమైన సహయాన్ని అందించడానికి తాము సిద్దంగా ఉన్నట్లు ఆయన తెలిపారు. కార్యక్రమంలో గీతం ప్రో`వైస్ ఛాన్స్‌లర్ ప్రొఫెసర్ వై.గౌతమ్‌రావు పాల్గొని ముఖ్యఅతిధిని జ్ఞాపికతో సన్మానించారు. గీతం సూల్ ఆఫ్ కంప్యూటర్ సైన్స్ అండ్ ఇంజనీరింగ్ డైరక్టర్ డాక్టర్ కె.తిరుపతిరావు, సిఎసఇ విభాగం అధిపతి ప్రొఫెసర్ జి.వి.ఎస్.రాజ్‌కుమార్, విదేశీ విద్యార్ధులు, పరిశోధకులు మరియు అధ్యాపకులు పెద్ద ఎత్తున పాల్గొన్నారు.
రిపోర్టర్ : సత్యనారాయణ, ఏయూ, విశాఖపట్నం.
