అస్వస్థతకు గురైన విద్యుత్ ఉద్యోగి

నేటి దినపత్రిక సూర్య బ్యూరో రాజమహేంద్రవరంతుఫాను విధ్వంసంలో గ్రామానికి వెలుగు నింపేందుకు అహర్నిశలు శ్రమించిన ఓ విద్యుత్ ఉద్యోగి ఒత్తిడికి గురై ఆస్పత్రి పాలయ్యాడు.

వాకలగరువు గ్రామ పంచాయతీ సచివాలయ విద్యుత్ ఉద్యోగి ముత్తాబత్తుల వెంకట్ ఇటీవల వచ్చిన అర్నాబ్ తుఫాను కారణంగా చెట్లు, విద్యుత్ స్తంభాలపై వైర్లు తెగిపడటంతో గత వారం రోజులుగా గ్రామంలో రాత్రి పగలు తేడా లేకుండా నిద్ర లేకుండా వర్షంలోనే విధులు నిర్వహించారు. గ్రామ ప్రజలకు నిరంతర విద్యుత్ అందించేందుకు చేసిన కృషిలో తీవ్ర ఒత్తిడికి గురై మంగళవారం బిపి తగ్గిపోవడంతో విధి నిర్వహణలో  కుప్పకూలిపోయారు. వెంటనే తోటి సిబ్బంది, స్థానికులు అమలాపురంలోని ఓ ప్రైవేట్ ఆస్పత్రికి తరలించారు. ప్రస్తుతం అక్కడ చికిత్స పొందుతున్నారు.విధి నిర్వహణలో అస్వస్థతకు గురైన ఉద్యోగికి ప్రభుత్వం తరపున మెరుగైన వైద్యం అందించి ఆదుకోవాలని గ్రామ ప్రజలు,సహచర ఉద్యోగులు అధికారులను కోరుతున్నారు.