ఇండోనేషియా స్టాక్ మార్కెట్ కీలక సంస్కరణలు

సూర్య అంతర్జాతీయ డెస్క్: ఇండోనేషియా క్యాపిటల్ మార్కెట్‌లో పారదర్శకతను పెంచే దిశగా ఆ దేశ స్టాక్ మార్కెట్ అధికారులు కీలక నిర్ణయం తీసుకున్నారు. పబ్లిక్‌గా లిస్ట్ అయిన కంపెనీలలో ఒక శాతం కంటే ఎక్కువ వాటాలు కలిగిన షేర్‌హోల్డర్లకు సంబంధించిన పూర్తి వివరాలను ఇకపై బహిరంగంగా ప్రచురించనున్నట్లు ఇండోనేషియా స్టాక్ ఎక్స్ఛేంజ్ (IDX) మరియు సెంట్రల్ సెక్యూరిటీస్ డిపాజిటరీ సంయుక్తంగా ప్రకటించాయి. ఈ కొత్త నిబంధనల ప్రకారం, ఆయా వాటాదారులు కంపెనీకి ప్రధాన ప్రమోటర్లా (కంట్రోలింగ్ షేర్‌హోల్డర్), లేక వారికి అనుబంధంగా ఉన్న వ్యక్తులు లేదా సంస్థలా (అఫిలియేట్స్) అనే విషయాలను స్పష్టంగా వెల్లడించనున్నారు.

పెట్టుబడిదారులకు మరింత స్పష్టమైన సమాచారాన్ని అందించడం ద్వారా మార్కెట్ పై నమ్మకాన్ని, సమగ్రతను పెంపొందించడమే లక్ష్యంగా ఈ సరికొత్త సంస్కరణలకు శ్రీకారం చుట్టారు. గతంలో పబ్లిక్ షెర్ హోల్డింగ్ డిస్‌క్లోజర్ పరిమితి ఐదు శాతంగా ఉండగా, దానిని మరింత కఠినతరం చేస్తూ ఒక శాతానికి కుదించారు. అక్టోబర్ 30 నాటి డేటా ఆధారంగా ప్రారంభం కానున్న ఈ వివరాలను ప్రతి నెలా స్టాక్ ఎక్స్ఛేంజ్ అధికారిక వెబ్‌పోర్టల్‌లో ప్రచురించనున్నారు. కంపెనీల యాజమాన్య నిర్మాణాలు, యాజమాన్య కేంద్రీకరణ అలాగే నియంత్రణ సంస్థల మధ్య సంబంధాలపై ఇన్వెస్టర్లకు మరింత పారదర్శకమైన అవగాహన కల్పించేందుకు ఈ నిర్ణయం ఎంతగానో దోహదపడుతుందని మార్కెట్ నిపుణులు అభిప్రాయపడుతున్నారు.