అమలాపురం మున్సిపల్ ఎన్నికల బరిలో కాంగ్రెస్: చైర్మన్ అభ్యర్థి ముషిణి మణికి 'బి' ఫారం అందజేసిన డీసీసీ అధ్యక్షుడు కొత్తూరి శ్రీనివాస్!

సూర్య లోకల్ డెస్క్, అమలాపురం: స్థానిక సంస్థల ఎన్నికల సమరంలో భాగంగా డాక్టర్ బి.ఆర్. అంబేద్కర్ కోనసీమ జిల్లా కేంద్రమైన అమలాపురంలో కాంగ్రెస్ పార్టీ ఎన్నికల కసరత్తు ముమ్మరం చేసింది. అమలాపురం మున్సిపల్ చైర్మన్ స్థానానికి కాంగ్రెస్ పార్టీ అభ్యర్థిగా ఎంపికైన శ్రీమతి ముషిణి ఎస్. కె. ఎన్. మణి గారికి జిల్లా కాంగ్రెస్ కమిటీ (డీసీసీ) అధ్యక్షులు శ్రీ కొత్తూరి శ్రీనివాస్ నేడు అధికారికంగా "బి" ఫారం  అందజేశారు.

అమలాపురంలో కాంగ్రెస్ శ్రేణుల సందడి:
ఈ సందర్భంగా పార్టీ నాయకులు, కార్యకర్తల సమక్షంలో ముషిణి మణి గారికి బీ-ఫారం అందజేస్తూ, ఎన్నికల్లో విజయమే లక్ష్యంగా పార్టీ శ్రేణులు సమష్టిగా పనిచేయాలని కొత్తూరి శ్రీనివాస్ పిలుపునిచ్చారు. అమలాపురం పట్టణ సమగ్ర అభివృద్ధి, ప్రజా సమస్యల పరిష్కారమే ప్రధాన ఎజెండాగా ప్రజల్లోకి వెళ్తామని కాంగ్రెస్ నాయకత్వం స్పష్టం చేసింది. బీ-ఫారం అందుకున్న అనంతరం ముషిణి మణి పార్టీ అధిష్టానానికి, జిల్లా అధ్యక్షులకు ధన్యవాదాలు తెలియజేస్తూ, పట్టణ ప్రజల ఆశీస్సులతో కాంగ్రెస్ జెండాను ఎగురవేస్తామని ధీమా వ్యక్తం చేశారు. ఈ కార్యక్రమంలో జిల్లా కాంగ్రెస్ పార్టీ ఉపాధ్యక్షులు వాకపల్లి రాంబాబు ,స్థానిక కాంగ్రెస్ ముఖ్య నాయకులు, కార్యకర్తలు పాల్గొన్నారు.