మేకల కాపరులపై బీట్ అధికారి దాడి!

•దాడికి పాల్పడిన అధికారిపై  అట్రాసిటీ కేసు నమోదు చేసి కఠినంగా శిక్షించాలి 

• ఆదివాసీ కోయ సంఘం డిమాండ్

మంచిర్యాల, సూర్య ప్రతినిధి : మేకలు మేపేందుకు అడవికి వెళ్లిన ఇద్దరు కాపరులపై బొప్పారం బీట్ అధికారి తిరుపతి విచక్షణారహితంగా దాడి చేశారని ఆదివాసీ కోయ సంఘం జిల్లా వర్కింగ్ ప్రెసిడెంట్ బోయిని నగేష్ దొర ఆరోపించారు. కోటపల్లి మండలం ఆల్గామ గ్రామంలో జరిగిన ఈ ఘటనను ఆయన తీవ్రంగా ఖండించారు.

ఆదివారం కోర్తె సంతోష్, సంపత్, ఓజన్న అడవిలో మేకలు మేపేందుకు వెళ్లగా, మధ్యాహ్నం సమయంలో బీట్ అధికారి తిరుపతి తన సిబ్బందితో అక్కడికి వచ్చారని తెలిపారు. ఎలాంటి కారణం లేకుండా సంతోష్, ఓజన్నలపై దాడి చేశారని ఆరోపించారు. కలెక్టర్‌కు ఫిర్యాదు చేసుకుంటారా, ఎవరికి చెప్పుకుంటారో చెప్పుకోండి అంటూ అధికారి బెదిరించినట్లు పేర్కొన్నారు.

దాడిలో సంతోష్, ఓజన్నలకు తొడలు, చేతులు, నడుము భాగాల్లో గాయాలయ్యాయని, నడవలేని పరిస్థితి ఏర్పడిందని నగేష్ దొర తెలిపారు. ఆదివాసీలపై అటవీ అధికారులు కక్షపూరితంగా వ్యవహరించడం సరికాదని, మేకలను ఎక్కడ మేపుకోవాలని ప్రశ్నించారు.

కాపరులపై దాడికి పాల్పడ్డారని ఆరోపణలు ఎదుర్కొంటున్న బీట్ అధికారి తిరుపతిపై ఎస్సీ, ఎస్టీ అట్రాసిటీ చట్టం కింద కేసు నమోదు చేసి కఠిన చర్యలు తీసుకోవాలని డిమాండ్ చేశారు. లేనిపక్షంలో ఆందోళనలను ఉధృతం చేస్తామని హెచ్చరించారు.

ఈ కార్యక్రమంలో ఆదివాసీ కోయ సంఘం జిల్లా అధ్యక్షుడు చెడంక మంతయ్య, ప్రధాన కార్యదర్శి మడే సమ్మయ్య పాల్గొన్నారు.