అకాల వర్షానికి 100 ఎకరాల అరటిపంట నేలమట్టం

లింగాల మేజర్ న్యూస్ : 
లింగాల మండల పరిధిలోని ఇంటేపల్లి గ్రామంలో సోమవారం రాత్రి వీచిన బలమైన గాలులు, కురిసిన అకాల వర్షానికి సుమారు 100 ఎకరాల అరటి పంట నేలమట్టమైంది. చేతికొచ్చిన పంట కళ్లెదుటే దెబ్బతినడంతో రైతులు తీవ్ర ఆవేదన వ్యక్తం చేస్తున్నారు.
ఇప్పటికే వర్షాభావ పరిస్థితులతో భూగర్భ జలాలు అడుగంటిపోయి నీటి ఎద్దడి నెలకొనడంతో పంటలను కాపాడుకునేందుకు రైతులు తీవ్ర ఇబ్బందులు పడుతున్నారు. ఈ పరిస్థితుల్లో అకాల వర్షం, ఈదురుగాలులు అరటి తోటలను పూర్తిగా దెబ్బతీయడంతో రైతులకు భారీ నష్టం వాటిల్లింది.
లక్షల రూపాయలు అప్పులు చేసి అరటి సాగు చేశామని, పంట నష్టంతో తీవ్రంగా నష్టపోయామని బాధిత రైతులు ఆవేదన వ్యక్తం చేశారు. ప్రభుత్వం వెంటనే పంట నష్టాన్ని అంచనా వేసి పరిహారం అందించి ఆదుకోవాలని వారు కోరారు. ప్రభుత్వం స్పందించకపోతే తీవ్ర ఆర్థిక ఇబ్బందులు ఎదుర్కోవాల్సి వస్తుందని రైతులు ఆందోళన వ్యక్తం చేశారు.

పి కృష్ణ. పులివెందుల స్టాఫ్ రిపోర్టర్