ఐసిడిఎస్ వెల్దుర్తి పరిధిలో పోషణ మాసోత్సవం, బాల్య వివాహాల నిర్మూలనపై అవగాహన సదస్సు

వెల్దుర్తి, సూర్య ప్రతినిధి మేజర్ న్యూస్  మండలంలోని తొమ్మిదవ అంగన్వాడీ కేంద్రంలో ఐసిడిఎస్ వెల్దుర్తి ప్రాజెక్ట్ ఆధ్వర్యంలో పోషణ మాసోత్సవం, అంగన్వాడీ ఉత్సవాన్ని శనివారం ఘనంగా నిర్వహించారు. ఈ కార్యక్రమానికి అంగన్వాడీ సూపర్వైజర్ పద్మావతి నాయకత్వం వహించారు.

ఈ సందర్భంగా సూపర్వైజర్ పద్మావతి తల్లులకు, గ్రామ ప్రజలకు పోషణ మాసోత్సవ ప్రాముఖ్యతను వివరించారు. చిన్న పిల్లలకు పోషణ బాల్య ప్రేరణ ఎంతైనా అవసరమని, పిల్లలకు అనుబంధ పోషకాహారాన్ని ప్రేరణతో ఏ విధంగా అందించాలో స్పష్టంగా తెలిపారు. పిల్లల శారీరక, మానసిక ఎదుగుదలకు సమతుల పోషకాహారం పునాది అని పేర్కొన్నారు.

అనంతరం ఐసిపిఎస్ (ICPS) యూనిట్ ప్రతినిధులు గీతావాణి, మౌనిక ఆధ్వర్యంలో 'బాల్య వివాహాల రహిత భారత్' (వివాహ శ్రీ విముక్త భారత్) ప్రచార కార్యక్రమంలో భాగంగా అవగాహన సదస్సు నిర్వహించారు. ఈ సందర్భంగా గీతావాణి మాట్లాడుతూ.. బాల్య వివాహాలు సమాజానికి శాపమని, చిన్న వయస్సులోనే పెళ్లిళ్లు చేయడం వల్ల అనేక అనర్థాలు ఎదురవుతాయని హెచ్చరించారు. బాల్య వివాహాల వల్ల పుట్టబోయే బిడ్డలు అనారోగ్యానికి గురవుతారని, అంతేకాకుండా తల్లి, పిల్లల మరణాల రేటు పెరిగే ప్రమాదం ఉందని ఆందోళన వ్యక్తం చేశారు. సమాజంలో ఆడపిల్లలకు తగిన స్వేచ్ఛ, గౌరవం ఇవ్వాలని, తల్లిదండ్రులు తమ పిల్ల పట్ల ప్రేమతో, శ్రద్ధగా వ్యవహరించాలని సూచించారు.

ప్రతి గ్రామంలోనూ, ప్రతి వార్డులోనూ బాల్య వివాహాలను పూర్తిగా అరికట్టాలని పిలుపునిచ్చారు. అనంతరం హాజరైన తల్లులందరిచే బాల్య వివాహాల నిర్మూలనపై ప్రతిజ్ఞ చేయించారు.

ఈ కార్యక్రమంలో అంగన్వాడీ టీచర్లు హెప్సిబా, విజయకుమారి, రేణుకతో పాటు అంగన్వాడీ హెల్పర్లు, స్థానిక ప్రజలు, తల్లులు విశేషంగా పాల్గొన్నారు.

సూర్య ప్రతినిధి షేక్ దస్తగిరి వెల్దుర్తి మండలం కర్నూలు జిల్లా