ఐరాసలో గళమెత్తిన అరకు ఎంపీ.

భారత్ తరఫున కీలక ప్రసంగం

-ఐక్యరాజ్యసమితి వేదికపై భారత్ తరఫున ప్రసంగించిన అరకు ఎంపీ తనుజారాణి

-సభ్యదేశాలన్నీ బకాయిలను సకాలంలో, పూర్తిస్థాయిలో చెల్లించాలని పిలుపు

-ఐరాస అభివృద్ధి కార్యక్రమాలకు తగినన్ని నిధులు కేటాయించాలని సూచన

-నిర్ణయాలు ఏకాభిప్రాయంతో జరగడం ముఖ్యమని వ్యాఖ్య

-భారత పార్లమెంటరీ ప్రతినిధి బృందంలో భాగంగా ఈ సమావేశంలో పాల్గొన్న వైసీపీ ఎంపీ

ఏపీ స్టేట్ బ్యూరో, అమరావతి :

అంతర్జాతీయ వేదికపై తెలుగు మహిళ, అరకు వైసీపీ ఎంపీ గుమ్మ తనుజారాణి తన గళాన్ని వినిపించారు. ఐక్యరాజ్యసమితి (ఐరాస) సాధారణ సభ 81వ సెషన్‌లో భాగంగా జరిగిన పరిపాలన, బడ్జెట్ కమిటీ (ఐదవ కమిటీ) మొదటి అధికారిక సమావేశంలో ఆమె భారత్ తరఫున ప్రాతినిధ్యం వహించి ప్రసంగించారు. ఈ కీలక సమావేశంలో ఆమె ఐరాస పనితీరు, ఆర్థిక స్థిరత్వం, సంస్కరణల ఆవశ్యకతపై భారత వాదనలను బలంగా వినిపించారు.

ఈ సందర్భంగా తనుజారాణి మాట్లాడుతూ.. ఐక్యరాజ్యసమితిలో సంస్కరణల ప్రక్రియను నిరంతరం కొనసాగించాల్సిన అవసరం ఉందని నొక్కిచెప్పారు. ఐరాస ఆర్థికంగా బలంగా ఉండాలంటే సభ్య దేశాలన్నీ తమ వాటాలను ఎలాంటి షరతులు లేకుండా, సకాలంలో, పూర్తిస్థాయిలో చెల్లించాలని ఆమె స్పష్టం చేశారు. కొన్ని దేశాలు నిధులను నిలిపివేయడం లేదా ఆలస్యం చేయడం వల్ల సంస్థ కార్యకలాపాలపై తీవ్ర ప్రభావం పడుతుందని, దీనిని అధిగమించాల్సిన అవసరం ఉందని సూచించారు.

ఐక్యరాజ్యసమితి అభివృద్ధి కార్యక్రమాలకు తగినన్ని ఆర్థిక వనరులను సమకూర్చడం చాలా ముఖ్యమని తనుజారాణి అభిప్రాయపడ్డారు. ఈ లక్ష్యాన్ని చేరుకోవడానికి 'యూఎన్80 ఇనిషియేటివ్' వంటి కార్యక్రమాలను సమర్థంగా ఉపయోగించుకోవాలని పిలుపునిచ్చారు.

కమిటీలో ఎలాంటి నిర్ణయమైనా సభ్యదేశాల మధ్య ఏకాభిప్రాయం ద్వారా జరగడం ఉత్తమమని, ఇది సంస్థ సమర్థతను పెంచుతుందని ఆమె పేర్కొన్నారు. అలాగే, ఐరాస పరిధిలోని ప్రత్యేక విభాగాలు, సలహా కమిటీల పాత్రలను గౌరవించాలని, వాటి పనిలో జోక్యం చేసుకోకూడదని సూచించారు.ప్రస్తుతం జరుగుతున్న ఐక్యరాజ్యసమితి సాధారణ సభ సమావేశాలకు హాజరైన 15 నుంచి 18 మంది సభ్యులు గల భారత పార్లమెంటరీ ప్రతినిధి బృందంలో తనుజారాణి కూడా ఒకరు. దేశంలోని భిన్న రాజకీయ, భౌగోళిక వైవిధ్యాన్ని ప్రతిబింబించేలా ఈ బృందాన్ని ఎంపిక చేశారు. అరకు వంటి ఏజెన్సీ ప్రాంతానికి చెందిన ఒక గిరిజన మహిళ ఐరాస వేదికపై దేశానికి ప్రాతినిధ్యం వహించడం గమనార్హం