అగ్నిప్రమాదాలపై అధికారులను ఆరా తీసిన సీఎం చంద్రబాబు

 అమరావతి: దీపావళి పండుగ వేళ ఆంధ్రప్రదేశ్‌లోని పలు ప్రాంతాల్లో వరుసగా చోటుచేసుకున్న తీవ్ర అగ్నిప్రమాదాల పట్ల ముఖ్యమంత్రి నారా చంద్రబాబు నాయుడు తీవ్ర విచారం వ్యక్తం చేశారు. రాజాం, గన్నవరం, తిరువూరు నియోజకవర్గాల పరిధిలో చోటుచేసుకున్న ఈ ప్రమాదాలపై ఆయన తక్షణమే స్పందించి, సంబంధిత ఉన్నతాధికారులతో మాట్లాడి ఘటనల వివరాలను ఆరా తీశారు. రాజాంలో ఒక ఆటోమొబైల్ షోరూమ్‌లో భారీగా మంటలు చెలరేగి షోరూమ్ పూర్తిగా దగ్ధం కాగా, కృష్ణా జిల్లా గన్నవరంలో బాణసంచా కాలుస్తున్న సమయంలో ఎగిసిపడిన నిప్పురవ్వలు పడి ఒక ఫర్నిచర్ దుకాణం తగలబడింది. ఇక ఎన్టీఆర్ జిల్లా తిరువూరులో విద్యుత్ షార్ట్ సర్క్యూట్ కారణంగా మరొక వ్యాపార దుకాణం కాలిభస్మమై భారీగా ఆస్తి నష్టం వాటిల్లింది. ఈ మూడు ప్రమాదాలపై అధికారుల నుంచి సమగ్ర సమాచారం సేకరించిన సీఎం చంద్రబాబు, అగ్నిమాపక మరియు స్థానిక యంత్రాంగం త్వరితగతిన స్పందించి నష్ట తీవ్రతను తగ్గించేలా చర్యలు తీసుకోవాలని ఆదేశించారు. అంతేకాకుండా, జరిగిన ఆస్తి నష్టంపై వెంటనే నివేదిక సమర్పించాలని, బాధితులకు ప్రభుత్వం తరఫున తగిన సహాయం అందిస్తామని ఆయన భరోసా ఇచ్చారు.