అది పొరపాటే..

ఎన్నికల సంఘం (ఈసీ) నియామకాల తీరుపై వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి సంచలన వ్యాఖ్యలు చేశారు. గతంలో కేంద్ర ఎన్నికల కమిషనర్ (సీఈసీ) మరియు ఎన్నికల కమిషనర్ల నియామక ప్రక్రియ చట్టానికి తాము మద్దతు తెలపడం పెద్ద పొరపాటని ఆయన బహిరంగంగా అంగీకరించారు. ఆనాడు మద్దతు ఇచ్చినందుకు ఇప్పుడు తీవ్రంగా బాధపడుతున్నామని ఆయన స్పష్టం చేశారు.

దేశంలోని ప్రజాస్వామ్య వ్యవస్థలు పటిష్టంగా ఉండాలంటే స్వతంత్ర సంస్థల ఎంపిక విధానంలో సమూల మార్పులు రావాలని జగన్ అభిప్రాయపడ్డారు. ప్రధానన్యాయమూర్తి (CJI) నేతృత్వంలోని కమిటీ ఆధ్వర్యంలోనే ఎన్నికల కమిషనర్ల నియామకం జరగాలని ఆయన డిమాండ్ చేశారు.

2024 ఎన్నికల్లో ఈవీఎంలు, ఇతర అంశాలపై తీవ్ర అక్రమాలు జరిగాయని తాను నమ్ముతున్నానని, దేశంలోని వ్యవస్థల పట్ల ప్రజలకు నమ్మకం సడలకుండా ఉండాలంటే పారదర్శకత ఎంతో అవసరమని ఆయన పేర్కొన్నారు. కేవలం కేంద్రంలోనే కాకుండా, రాష్ట్రంలో కూడా ఎస్‌ఈసీ (SEC) నియామక విధానం పూర్తిగా మారాలని, అప్పుడే ప్రజాస్వామ్య వ్యవస్థలపై ప్రజలకు విశ్వాసం ఉంటుందని వైఎస్ జగన్ స్పష్టం చేశారు.