ఆశా వర్కర్లకు కనీస వేతనాలు చెల్లించాలి — ఎమ్మెల్యే పల్లా శ్రీనివాసరావుకు యూనియన్‌ వినతి
గాజువాక, అక్టోబర్ 6, మేజర్ న్యూస్ : గత 20 ఏళ్లుగా వైద్యారోగ్య శాఖలో సేవలందిస్తున్న ఆశా వర్కర్ల సమస్యలను తక్షణమే పరిష్కరించి, వారికి కనీస వేతనాలు చెల్లించాలని ఏపీ ఆశా వర్కర్స్‌ యూనియన్‌ (సీఐటీయూ) డిమాండ్ చేసింది. ఈ మేరకు గాజువాకలోని తెదేపా కార్యాలయంలో పార్టీ రాష్ట్ర అధ్యక్షుడు, ఎమ్మెల్యే పల్లా శ్రీనివాసరావును కలిసి యూనియన్‌ ప్రతినిధులు వినతిపత్రం అందజేశారు. గత ఏడేళ్లుగా వేతనాలు పెంచకపోవడంతో పెరుగుతున్న ధరల నేపథ్యంలో కుటుంబాలను పోషించుకోవడం భారంగా మారిందని ఆవేదన వ్యక్తం చేశారు. ప్రభుత్వం ఇచ్చే రూ.10 వేల గౌరవ వేతనంలో ఆసుపత్రులు, పీహెచ్‌సీల రాకపోకలకే రూ.3 వేల నుంచి రూ.4 వేల వరకు ఖర్చవుతోందని వివరించారు.
ఆశా వర్కర్లను పర్మనెంట్‌ చేయడంతో పాటు ఉద్యోగ భద్రత కల్పించాలని, సమాన పనికి సమాన వేతనం, మెటర్నిటీ తదితర సెలవులు వర్తింపజేయాలని నాయకులు కోరారు. పెరుగుతున్న జనాభాకు అనుగుణంగా ఆశాల సంఖ్యను పెంచి పనిభారాన్ని తగ్గించాలని, శిక్షణ పొందిన ఏఎన్‌ఎం, జీఎన్‌ఎంలకు శాశ్వత పోస్టుల భర్తీలో ప్రాధాన్యత ఇవ్వాలని విజ్ఞప్తి చేశారు. అదేవిధంగా రూ.10 లక్షల గ్రూప్‌ ఇన్సూరెన్స్‌, ప్రమాద బీమా సౌకర్యం కల్పించాలని, రిటైర్మెంట్‌ ప్రయోజనాలతో పాటు ప్రభుత్వ సంక్షేమ పథకాలను నిరంతరాయంగా అందించాలని డిమాండ్ చేశారు. ఈ కార్యక్రమంలో యూనియన్‌ నాయకులు, పలువురు ఆశా కార్యకర్తలు పాల్గొన్నారు.
