ఆరిలోవ వైన్ షాప్ వద్ద ఇరు వర్గాల మధ్య ఘర్షణ.... నలుగురు నిందితుల అరెస్ట్, రిమాండ్‌

ఆరిలోవ, సూర్య : ఆరిలోవ లాస్ట్ బస్ స్టాప్ సమీపంలో ఉన్న  ఎస్ కె ఎం ఎల్ వైన్ షాప్ వద్ద ఈ నెల 11న మధ్యాహ్నం  ఇరు వర్గాల మధ్య ఘర్షణ చోటుచేసుకుంది.ఆరిలోవ ప్రాంతానికి చెందిన ముల్లి దినేష్‌కు, అదే ప్రాంతానికి చెందిన పిన్నింటి సుధీర్, రాజోలు సుధాకర్, కొప్పర వంశీ, కందిస మోహన్‌లకు మధ్య వివాదం తలెత్తింది. ఈ క్రమంలో వైన్ షాప్ మొదటి అంతస్తులో ఇరు వర్గాలు బీరు బాటిళ్లతో పరస్పరం దాడి చేసుకున్నట్లు ఫిర్యాదులో పేర్కొన్నారు.ఈ ఘటనలో ముల్లి దినేష్ బీరు బాటిల్‌తో రాజోలు సుధాకర్, కొప్పర వంశీలపై దాడి చేయగా, అనంతరం మిగిలిన నలుగురు కలిసి ముల్లి దినేష్‌పై బీరు బాటిళ్లు, విరిగిన తలుపు ముక్కతో దాడి చేసినట్లు ఆరోపణలు ఉన్నాయి. ఈ దాడిలో ముల్లి దినేష్‌కు తలపై మరియు శరీరంపై రక్తగాయాలు కాగా, రాజోలు సుధాకర్, కొప్పర వంశీలకు కూడా తలపై రక్తగాయాలయ్యాయి.ఈ ఘటనపై ఇరు వర్గాల నుంచి ఫిర్యాదులు స్వీకరించిన ఆరిలోవ పోలీస్ స్టేషన్ ఇన్‌స్పెక్టర్ ఆఫ్ పోలీస్ ఎస్. శ్రీనివాస్  క్రైమ్ నంబర్  291/2026, సెక్షన్లు 109(1), 126(2) r/w 3(5) BNS నమోదు చేసి, ముల్లి దినేష్ ఇచ్చిన ఫిర్యాదు మేరకు కేసులో నిందితులుగా ఉన్న పిన్నింటి సుధీర్, రాజోలు సుధాకర్, కొప్పర వంశీ, కందిస మోహన్‌లను  దర్యాప్తు చేసిన  ఆరిలోవ పోలీస్ స్టేషన్ ఎస్‌ఐ హెచ్. వరహాల నాయుడు  అరెస్ట్ చేసి, తదుపరి న్యాయపరమైన చర్యల్లో భాగంగా రిమాండ్‌కు తరలించినట్లు  ఆరిలోవ పోలీస్ స్టేషన్ సిఐ ఎస్.  శ్రీనివాస్ తెలిపారు.

రిపోర్టర్ : శ్రీనివాస్, అరిలోవా, విశాఖపట్నం.