6, 7, 8 తేదీల్లో సేవా సేతు అభియాన్ క్యాంపులు

విజయవాడ,  మేజర్ న్యూస్ : ఏపీసీపీడీసీఎల్ పరిధిలో అక్టోబర్ 6, 7, 8 తేదీల్లో ‘సేవా సేతు అభియాన్’ క్యాంపులు నిర్వహించనున్నట్లు సంస్థ సీఎండీ పి.పుల్లారెడ్డి తెలిపారు. కేంద్ర ప్రభుత్వం అమలు చేస్తున్న పీఎం సూర్య ఘర్ పథకంలో భాగంగా నిర్వహించే ఈ క్యాంపుల్లో రూఫ్‌టాప్ సోలార్ విద్యుత్‌పై ప్రజలకు అవగాహన కల్పించడంతో పాటు పథకం అర్హతలు, దరఖాస్తు విధానం, సబ్సిడీ పొందే ప్రక్రియ, సౌర విద్యుత్ ప్లాంట్ ఏర్పాటు, నెట్ మీటరింగ్ తదితర అంశాలపై పూర్తి సమాచారం అందించనున్నారు. అర్హత కలిగిన గృహ వినియోగదారులకు 1 కిలోవాట్‌కు రూ.30 వేలు, 2 కిలోవాట్లకు రూ.60 వేలు, 3 కిలోవాట్లు లేదా అంతకంటే ఎక్కువ సామర్థ్యానికి గరిష్ఠంగా రూ.78 వేల వరకు కేంద్ర ప్రభుత్వం సబ్సిడీ అందిస్తోందని సీఎండీ తెలిపారు. క్యాంపుల్లో బ్యాంకర్లు, సోలార్ విక్రేతలు, ఏపీసీపీడీసీఎల్ అధికారులు పాల్గొని వినియోగదారుల సందేహాలను నివృత్తి చేయనున్నారు. రూఫ్‌టాప్ సోలార్ ద్వారా విద్యుత్ బిల్లులను తగ్గించుకోవడంతో పాటు స్వచ్ఛమైన పునరుత్పాదక ఇంధనాన్ని ప్రోత్సహించవచ్చని, అర్హత ఉన్న ప్రతి గృహ వినియోగదారుడు ఈ అవకాశాన్ని సద్వినియోగం చేసుకోవాలని పుల్లారెడ్డి కోరారు. పథకం లేదా క్యాంపులకు సంబంధించి సందేహాలుంటే ఏపీసీపీడీసీఎల్ 1912 కాల్ సెంటర్‌ను సంప్రదించాలని అధికారులు తెలిపారు.

✍️ ప్రేమ్ రాజ్, విజయవాడ.