19 ఎంపీటీసీ స్థానాలకు కొనసాగుతున్న నామినేషన్ల ప్రక్రియ..

పొదలకూరు,  మేజర్ న్యూస్ :     : పొదలకూరు మండలంలో స్థానిక సంస్థల ఎన్నికల సందడి ఊపందుకుంది. మండలంలోని మొత్తం 19 ఎంపీటీసీ స్థానాలకు సంబంధించి నామినేషన్ల ప్రక్రియ జోరుగా కొనసాగుతోంది. ఇప్పటివరకు 10 ఎంపీటీసీ సెగ్మెంట్లకు తెలుగుదేశం పార్టీ తరఫున 14 మంది, వైఎస్సార్ కాంగ్రెస్ పార్టీ తరఫున 9 మంది నామినేషన్లు దాఖలు చేసినట్లు ఎన్నికల రిటర్నింగ్ అధికారి (ఆర్వో) వెల్లడించారు. ఇరు పార్టీల నుంచి కలిపి మొత్తం 23 నామినేషన్లు దాఖలైనట్లు తెలిపారు.ఒకే పార్టీ నుంచి పలువురు ఆశావహులు నామినేషన్లు దాఖలు చేస్తుండటంతో మండల రాజకీయాలు ఆసక్తికరంగా మారుతున్నాయి. నామినేషన్ల స్వీకరణ ప్రక్రియ ఈ నెల 23వ తేదీ సాయంత్రం వరకు కొనసాగుతుందని ఆర్వో తెలిపారు. 24వ తేదీన నామినేషన్ పత్రాల పరిశీలన (స్క్రూటినీ), 25వ తేదీన నామినేషన్ల ఉపసంహరణకు అవకాశం ఉంటుందని వివరించారు.నామినేషన్ల ఉపసంహరణ అనంతరం ఎన్నికల బరిలో నిలిచే అభ్యర్థుల తుది జాబితాపై స్పష్టత రానుంది. మరోవైపు ప్రధాన రాజకీయ పార్టీల నుంచి ఆశావహుల సంఖ్య పెరుగుతుండటంతో మండలంలో ఎన్నికల వాతావరణం వేడెక్కుతోంది.