జడ్పీటీసీ, ఎంపీటీసీ ఎన్నికల్లో పోటీకి కాంగ్రెస్ సిద్ధం: అంబాజీపేట మండల స్థాయి సమావేశంలో ఏకగ్రీవ నిర్ణయం
అంబాజీపేట మేజర్ న్యూస్ : రానున్న జడ్పీటీసీ, ఎంపీటీసీ స్థానిక సంస్థల ఎన్నికల్లో కాంగ్రెస్ పార్టీ తరపున అభ్యర్థులను పూర్తిస్థాయిలో బరిలోకి దింపాలని అంబాజీపేట మండల కాంగ్రెస్ కమిటీ ఏకగ్రీవంగా నిర్ణయించింది. అంబాజీపేట మండల కాంగ్రెస్ పార్టీ ముఖ్య కార్యకర్తల సమావేశం మండల అధ్యక్షులు దొమ్మేటి వినోద్ కుమార్ అధ్యక్షతన శుక్రవారం స్థానికంగా నిర్వహించారు. ఈ సమావేశంలో రాబోయే స్థానిక ఎన్నికల్లో పార్టీ అనుసరించాల్సిన వ్యూహాలు, క్షేత్రస్థాయిలో పార్టీ బలోపేతానికి తీసుకోవాల్సిన కార్యాచరణపై నాయకులు సమగ్రంగా చర్చించారు.
గ్రామ స్థాయి నుంచి కాంగ్రెస్ పార్టీని పటిష్టం చేయాలని, ప్రజా సమస్యలపై నిరంతరం పోరాటం చేస్తూ స్థానిక ఎన్నికల్లో విజయమే లక్ష్యంగా ప్రతి ఒక్క కార్యకర్త ఐక్యంగా పనిచేయాలని నాయకులు పిలుపునిచ్చారు. ప్రజా సమస్యలను పరిష్కరించడంలో పాలకులు విఫలమవుతున్న తీరును ప్రజల్లోకి విస్తృతంగా తీసుకెళ్లాలని సూచించారు.
ఈ సమావేశంలో ఏఐసీసీ సభ్యులు జంగా గౌతమ్, పీసీసీ సభ్యులు మాచవరపు శివన్నారాయణ, ములపర్తి మోహన్ రావు, జిల్లా ప్రధాన కార్యదర్శి నెల్లి వెంకట రమణ, జిల్లా ఉపాధ్యక్షులు వాకపల్లి రాంబాబు, మహ్మద్ ఇస్మాయిల్, అబీబ్, పితాని నరసింహ మూర్తి, కొల్లు సరోజిని తదితరులు పాల్గొన్నారు.
