యువతకు కాంగ్రెస్‌ పెద్దపీట.. రాకేష్‌రెడ్డికి కీలక పగ్గాలు
ఏదులాపురం మున్సిపాలిటీ యువజన కాంగ్రెస్‌ అధ్యక్షుడిగా ఏకగ్రీవ ఎన్నిక
ఖమ్మం రూరల్ సూర్య మేజర్ న్యూస్ : విద్యావంతులైన యువతకు రాజకీయాల్లో ప్రాధాన్యత కల్పిస్తూ కాంగ్రెస్‌ పార్టీ కీలక బాధ్యతలు అప్పగిస్తోంది. ఇందులో భాగంగా ఏదులాపురం మున్సిపాలిటీ కాంగ్రెస్‌ యువజన అధ్యక్షుడిగా 28వ వార్డుకు చెందిన గుర్రం రాకేష్‌రెడ్డి ఏకగ్రీవంగా ఎన్నికయ్యారు.
ఆదివారం 31వ వార్డులోని జీవీఆర్‌ ఫంక్షన్‌ హాల్‌లో నిర్వహించిన 32 వార్డుల కాంగ్రెస్‌ కమిటీల నియామక కార్యక్రమంలో మున్సిపాలిటీ కాంగ్రెస్‌ అధ్యక్షుడు బానోతు కిషోర్‌ నాయక్‌ రాకేష్‌రెడ్డి నియామకాన్ని ప్రకటించారు. ఎంఏ, బీఈడీ ఉన్నత విద్యార్హతలు కలిగిన రాకేష్‌రెడ్డికి యువజన కాంగ్రెస్‌ బాధ్యతలు అప్పగించడం పట్ల పార్టీ శ్రేణులు హర్షం వ్యక్తం చేశాయి.
యువతను సంఘటితం చేసి, పార్టీ బలోపేతానికి కృషి చేస్తా
ఈ సందర్భంగా రాకేష్‌రెడ్డి మాట్లాడుతూ తనపై నమ్మకంతో కీలక బాధ్యతలు అప్పగించిన పార్టీ నాయకత్వానికి కృతజ్ఞతలు తెలిపారు. యువతను సంఘటితం చేస్తూ, ప్రజా సమస్యల పరిష్కారంలో యువతను భాగస్వాములను చేస్తానని, కాంగ్రెస్‌ పార్టీ బలోపేతానికి శక్తివంచన లేకుండా కృషి చేస్తానని తెలిపారు. తన నియామకానికి సహకరించిన మంత్రి పొంగులేటి శ్రీనివాస్‌రెడ్డి క్యాంపు కార్యాలయ ఇన్‌చార్జి తుంబూరు దయాకర్‌రెడ్డికి ప్రత్యేక ధన్యవాదాలు తెలిపారు.
రాకేష్‌రెడ్డి నియామకం పట్ల కాంగ్రెస్‌ నాయకులు, కార్యకర్తలు, మిత్రులు అభినందనలు తెలిపారు. ఉన్నత విద్యార్హతలు కలిగిన యువకుడికి కీలక బాధ్యతలు అప్పగించడంతో పార్టీలో యువతకు ప్రాధాన్యత పెరిగిందని, రాకేష్‌రెడ్డి నాయకత్వంలో యువజన కాంగ్రెస్‌ మరింత బలోపేతం కావాలని ఆకాంక్షించారు.
