యువజన ఉత్సవాలకు రంగం సిద్ధం!

నవంబర్ 12న రంగారెడ్డి జిల్లా స్థాయి పోటీలు.. 15–29 ఏళ్ల యువతకు అవకాశం

ఉత్తమ ప్రతిభ కనబరిచిన వారికి రాష్ట్ర, జాతీయ స్థాయి పోటీల్లో పాల్గొనే అవకాశం

(రంగారెడ్డి - మేజర్ న్యూస్) : యువతలో దాగి ఉన్న కళా ప్రతిభను వెలికితీసి, వారిని జిల్లా, రాష్ట్ర, జాతీయ స్థాయిల్లో ప్రోత్సహించేందుకు జిల్లా యువజన, క్రీడల శాఖ ఆధ్వర్యంలో జిల్లా స్థాయి యువజన ఉత్సవాలు నిర్వహించనున్నారు. 30వ జాతీయ యువజన ఉత్సవాలను పురస్కరించుకుని ఈ నెల 12న సరూర్‌నగర్‌లోని ఇండోర్ స్టేడియంలో ఉదయం 9 గంటల నుంచి పోటీలు ప్రారంభం కానున్నాయి. 15 నుంచి 29 సంవత్సరాల లోపు వయస్సు కలిగిన యువతీ యువకులు ఈ పోటీల్లో పాల్గొనేందుకు అర్హులు.

ఐదు విభాగాల్లో పోటీలు

యువజన ఉత్సవాల్లో భాగంగా జానపద నృత్యం, జానపద గీతాలు, పోస్టర్ తయారీ, వీధి నాటకం, కవిత్వ రచన విభాగాల్లో పోటీలు నిర్వహించనున్నారు. జానపద నృత్యం, జానపద గీతాల పోటీల్లో ఒక్కో బృందానికి గరిష్ఠంగా 10 మందికి అవకాశం కల్పించారు. ఈ ప్రదర్శనలు 5 నుంచి 8 నిమిషాల నిడివితో ఉండాలి. జానపద గీతాల విభాగంలో సినిమా పాటలకు అనుమతి లేదు. భారతీయ సంప్రదాయాలకు అనుగుణంగా ప్రదర్శనలు ఉండాలి.

పోస్టర్ తయారీ పోటీలో పాల్గొనేవారు ఏ3 పరిమాణంలో పోస్టర్ రూపొందించాలి. ఇందుకు 90 నిమిషాల సమయం కేటాయించారు. పోస్టర్‌పై సంస్థ లేదా బ్రాండ్ పేరు ఉండకూడదు. అవసరమైన సామగ్రిని అభ్యర్థులే తీసుకురావాలి. వీధి నాటకంలో ఒక్కో బృందానికి గరిష్ఠంగా 10 మంది పాల్గొనే అవకాశం ఉంది. కవిత్వ రచన పోటీల్లో తెలుగు, ఇంగ్లీష్, హిందీ భాషల్లో పాల్గొనవచ్చు. కవితను 60 నిమిషాల్లో రాయాల్సి ఉండగా, అది 500 పదాలకు మించకూడదు.

ఆన్‌లైన్‌లో దరఖాస్తు చేసుకోవాలి

పోటీల్లో పాల్గొనాలనుకునే యువతీ యువకులు నవంబర్ 11వ తేదీలోగా దరఖాస్తు చేసుకోవాలి. అభ్యర్థులు తమ పేరు, వయస్సు, పుట్టిన తేదీ, ఆధార్ వివరాలు, ఫోన్ నంబర్, పాల్గొనే పోటీ విభాగం తదితర వివరాలను సమర్పించాలి. ఆన్‌లైన్‌లో దరఖాస్తు చేసుకునేందుకు ఇక్కడ క్లిక్ చేయండి.

మరిన్ని వివరాల కోసం జిల్లా యువజన, క్రీడల కార్యాలయం, ఇండోర్ స్టేడియం, సరూర్‌నగర్‌ను సంప్రదించవచ్చు. ఈమెయిల్: ksteprr@gmail.com, ఫోన్: 9849909077.

జాతీయ స్థాయికి వెళ్లే అవకాశం

ప్రతి కళాకారుడు ఒక విభాగంలో మాత్రమే పాల్గొనాల్సి ఉంటుంది. పోటీల్లో విజేతల ఎంపికపై న్యాయనిర్ణేతల నిర్ణయమే తుది నిర్ణయమని అధికారులు స్పష్టం చేశారు. జిల్లా స్థాయిలో ఎంపికైన ఉత్తమ కళాకారులు రాష్ట్ర స్థాయి యువజన ఉత్సవాల్లో పాల్గొంటారు. అక్కడ ఎంపికైన వారు 2027 జనవరి 10 నుంచి 12 వరకు ఢిల్లీలో నిర్వహించనున్న జాతీయ స్థాయి యువజన ఉత్సవాల్లో తమ ప్రతిభను ప్రదర్శించే అవకాశం పొందుతారు. ఈ అవకాశాన్ని యువతీ యువకులు సద్వినియోగం చేసుకోవాలని జిల్లా కలెక్టర్  కోరారు.