వ్యవసాయానికి 24 గంటల కరెంటు ఇవ్వాల్సిందే

పెద్దవంగర, మేజర్ న్యూస్, వ్యవసాయానికి 24 గంటలు కరెంటు ఇవ్వాల్సిందేనని బిఆర్ఎస్ మండల పార్టీ అధ్యక్షుడు ఈదురు ఐలయ్య ప్రభుత్వాన్ని డిమాండ్ చేశారు. బుధవారం పెద్దవంగర మండలంలోని వడ్డేకొత్తపల్లి 33/ 11 కెవి సబ్ స్టేషన్ దగ్గర బిఆర్ఎస్ పార్టీ ఆధ్వర్యంలో రైతులకు 24 గంటల నాణ్యమైన కరెంటు అందించాలనే ఉద్దేశంతో తొర్రూర్ - వలిగొండ ప్రధాన రహదారిపై బైఠాయించి రాస్తారోకో చేశారు. ఈ సందర్భంగా మండల పార్టీ అధ్యక్షుడు ఈదురు ఐలయ్య మాట్లాడుతూ ప్రభుత్వం రైతులను నమ్మించి నయవంచన చేసిందని, రైతులకు నాణ్యమైన 24 గంటల ఉచిత కరెంటు ఇస్తామని చెప్పి కనీసం 6 నుండి 10 కోతల్లేని కరెంటు  కూడా ఇవ్వలేని, ఆసమర్థ కాంగ్రెస్ ప్రభుత్వం వెంటనే గద్దె దిగిపోవాలని, రైతుల పంటలు చివరి దశలో ఉన్నాయని ఎల్ నినో ప్రభావంతో వర్షాలు సరిగా రాలేక ఒకవైపు ఇబ్బంది పడుతుంటే, మరొకవైపు ప్రభుత్వం మాత్రం కరెంటు ఇవ్వక రైతులను ఆందోళనలకు గురి చేస్తుందని, రైతుల యొక్క బాధలు వర్ణనాతీతమని, ఎండిపోయిన పంటలకు ప్రభుత్వమే నష్టపరిహారం చెల్లించాలని అన్నారు. రైతులు అరిగోస పడుతున్నా ప్రభుత్వం మాత్రం నిమ్మకు నీరెత్తనట్లుగా వ్యవహరించడం సిగ్గుచేటని, కరెంటు కోతలతో రైతులను ఆగం చేస్తున్నారని, ముఖ్యమంత్రి ఒక రకంగా మాట్లాడితే, మంత్రులు మాత్రం మరొక రకంగా మాట్లాడుతున్నారని ఇది వారి అసమర్ధ పాలనకు నిదర్శనమని ఎద్దేవా చేశారు. రైతులకు 24 గంటల నాణ్యమైన కరెంటు ఇవ్వకపోతే బీఆర్ఎస్ పార్టీ ఆధ్వర్యంలో రైతుల పక్షాన పెద్ద ఎత్తున ఉద్యమం చేయడానికి వెనకాడవోమని, ఇప్పటికైనా ప్రభుత్వం కళ్లు తెరిచి రైతులకు నాణ్యమైన కరెంటు అందించాలని బిఆర్ఎస్ పార్టీ ఆధ్వర్యంలో రైతుల పక్షాన డిమాండ్ చేశారు. ఈ కార్యక్రమంలో సీనియర్ నాయకులు రామచంద్రయ్య శర్మ, శ్రీరామ్ సంజయ్, కనుకుంట్ల వెంకన్న, శ్రీరామ్ సుధీర్, తల్లిదండి సుధాకర్ రాసాల సమ్మయ్య మనపురం రవి బొమ్మిడి కృష్ణారెడ్డి సర్పంచ్ లు దంతాలపల్లి పరశురాములు, పటేల్ నాయక్, కాసాని హరీష్, కవిత యాకన్న, ప్రదీప్, నాయకులు వెంకన్న, పూర్ణచందర్, బాలు, భాస్కర్, పూల్ సింగ్, కుమారస్వామి, గంగాధర్, విజయ శ్రీనివాస్, వెంకట్ రెడ్డి, వీరన్న, బిక్షపతి, బిఆర్ఎస్ పార్టీ శ్రేణులు, రైతులు తదితరులు పాల్గొన్నారు.

రిపోర్టర్ ;రామ్మూర్తి  ,జనగామ జిల్లా