వినాయక్ సాగర్, మహాలక్ష్మి ఆలయ పరిసరాల్లో అన్ని ఏర్పాట్లు పూర్తి

సూర్య నిర్మల్ ప్రతినిధి:దసరా, బతుకమ్మ ఉత్సవాల సందర్భంగా నిర్మల్ పట్టణంలో మున్సిపల్ శాఖ ఆధ్వర్యంలో అన్ని ఏర్పాట్లు పూర్తి చేసినట్లు మున్సిపల్ వైస్‌ చైర్మన్ అప్పాల గణేష్ చక్రవర్తి తెలిపారు. వినాయక్ సాగర్, మహాలక్ష్మి ఆలయ పరిసరాల్లో ఏర్పాట్లను ఆయన పరిశీలించారు.వినాయక్ సాగర్ వద్ద దుర్గామాత విగ్రహాల నిమజ్జనానికి క్రేన్‌, గజ ఈతగాళ్లను అందుబాటులో ఉంచినట్లు పేర్కొన్నారు. మహాలక్ష్మి ఆలయం వద్ద శమీ పూజ, రావణ దహన కార్యక్రమాల వీక్షణకు బారికేడ్లు, విద్యుత్ దీపాలు ఏర్పాటు చేశామన్నారు. భక్తులకు ఎలాంటి అసౌకర్యాలు కలగకుండా ప్రత్యేక చర్యలు తీసుకున్నట్లు వెల్లడించారు.
దసరా రోజున ట్రాఫిక్ రద్దీని దృష్టిలో ఉంచుకుని కాలినడకన, ద్విచక్ర వాహనాలపై వచ్చేవారు గాంధీ చౌక్‌, విశ్వనాథ్‌పేట్ మార్గంలో, నాలుగు చక్రాల వాహనాలు, ఆటోల్లో వచ్చేవారు కలెక్టరేట్ మార్గంలో రావాలని సూచించారు. ప్రజలు అధికారులకు సహకరించి పండుగలను ప్రశాంతంగా, ఆనందోత్సాహాలతో జరుపుకోవాలని కోరారు.ఈ కార్యక్రమంలో కౌన్సిలర్లు పెండం శ్రీనివాస్, శ్రీరామోజీ నరేష్, గుంజాల లక్ష్మి చైతన్య, లక్కాకుల హరీష్, మాజీ కౌన్సిలర్ తోట నర్సయ్య, ఆలయ కమిటీ చైర్మన్ తాళ్ల రాజు, మాజీ చైర్మన్ కుడుకల గంగాధర్, విశ్వహిందూ పరిషత్ నాయకులు పాల్గొన్నారు.