*విద్యార్థులకు ఫోక్సో చట్టంపై న్యాయ అవగాహన..*

టేక్మల్;సురక్షిత్ బచ్పన్ అభియాన్‌లో భాగంగా. శుక్రవారం మెదక్ జిల్లా టేక్మాల్ మండలంలోని బోడ్మట్ పల్లి జిల్లా పరిషత్ ఉన్నత పాఠశాలలో పోక్సో చట్టంపై న్యాయ అవగాహన కార్యక్రమం నిర్వహించారు. జాతీయ న్యాయ సేవాధికార సంస్థ, రాష్ట్ర న్యాయ సేవాధికార సంస్థ ఆదేశాల మేరకు,మెదక్ జిల్లా న్యాయ సేవాధికార సంస్థ ఆధ్వర్యంలో మండల్ లీగల్ సర్వీస్ కమిటీ అల్లాదుర్గ్  నేతృత్వంలో ఈ కార్యక్రమాన్ని చేపట్టింది.ఈ కార్యక్రమానికి ముఖ్య అతిథిగా హాజరై అల్లాదుర్గ్ జూనియర్ సివిల్ జడ్జి, మండల్ లీగల్ సర్వీస్ కమిటీ చైర్‌పర్సన్ న్యాయమూర్తి ఎ.సుచరిత మాట్లాడుతూ.... బాలల హక్కులు, భద్రత, రక్షణ, సంక్షేమంపై ప్రతి ఒక్కరూ అవగాహన కలిగి ఉండాలని సూచించారు. ప్రతి బాల, బాలికలు భయం లేకుండా సురక్షిత వాతావరణంలో జీవించడంతోపాటు విద్యను అభ్యసించి, తమ హక్కులను స్వేచ్ఛగా వినియోగించుకునే హక్కు కలిగి ఉంటారని తెలిపారు.బాల,బాలికల పట్ల అసభ్యకరంగా ప్రవర్తించడం, లైంగిక వేధింపులకు పాల్పడటం వంటి నేరాలకు పాల్పడితే పోక్సో చట్టం ప్రకారం కఠిన శిక్షలు తప్పవని హెచ్చరించారు. బాలలపై జరిగే హింస, వేధింపులు, లైంగిక దోపిడీ, ఇతర అనుచిత చర్యలను అరికట్టడంలో ప్రతి ఒక్కరూ బాధ్యతాయుతంగా వ్యవహరించాలని పేర్కొన్నారు.విద్యార్థినులకు గుడ్ టచ్‌–బ్యాడ్ టచ్‌, వ్యక్తిగత భద్రత, లైంగిక వేధింపుల నివారణ, ఆన్‌లైన్ భద్రత, బాలల హక్కులపై వివరించారు. ఎవరైనా అనుచితంగా ప్రవర్తించినా, అవాంఛనీయ పరిస్థితులు ఎదురైనా భయపడకుండా తల్లిదండ్రులు, ఉపాధ్యాయులు లేదా సంబంధిత అధికారులకు వెంటనే తెలియజేయాలని సూచించారు.బాలల రక్షణకు సంబంధించిన చట్టాలు, వాటి ప్రాముఖ్యతతోపాటు అవసరమైన సందర్భాల్లో మండల్ లీగల్ సర్వీస్ కమిటీ ద్వారా అందించే ఉచిత న్యాయ సహాయం గురించి విద్యార్థులకు అవగాహన కల్పించారు. సెల్ ఫోన్లు, ఇంస్టాగ్రామ్ వల్ల బంగారు భవిష్యత్తు పాడు చేసుకోవద్దని అన్నారు,బాలల భద్రత కేవలం తల్లిదండ్రుల బాధ్యత మాత్రమే కాదని, ఉపాధ్యాయులు, విద్యాసంస్థలు, ప్రభుత్వ శాఖలు, సమాజంలోని ప్రతి ఒక్కరి బాధ్యత అని న్యాయమూర్తి స్పష్టం చేశారు. బాలల హక్కులను గౌరవిస్తూ వారికి సురక్షితమైన, ఆహ్లాదకరమైన విద్యా వాతావరణాన్ని కల్పించేందుకు అందరూ సమిష్టిగా కృషి చేయాలని పిలుపునిచ్చారు.విద్యార్థుల్లో బాలల హక్కులు, వ్యక్తిగత భద్రత, చట్టపరమైన రక్షణపై అవగాహన పెంపొందించడమే ఈ కార్యక్రమం ప్రధాన లక్ష్యమని తెలిపారు. విద్యార్థినులు దుశ్చర్యలకు దూరంగా ఉంటూ అప్రమత్తంగా ఉండాలని, పట్టుదలతో చదివి ఉన్నత శిఖరాలను అధిరోహించాలని సూచించారు.ఈ కార్యక్రమంలో గ్రామ సర్పంచ్  అవినాష్ కుమార్, ఏ.ఎస్.ఐ శంకర్,పాఠశాల ప్రధానోపాధ్యాయులు, లత,ఉపాధ్యాయులు,  లీగల్ సర్వీసెస్ సిబ్బంది, టి.ఆంజనేయులు,విద్యార్థినులు పాల్గొన్నారు.