telangana
రూ.2.50 లక్షల లంచం తీసుకుంటూ డిప్యూటీ తహసీల్దార్‌ సహా ముగ్గురు ఏసీబీకి పట్టివేత..!
మేడ్చల్ జిల్లా ప్రతినిధి, కీసర, మేజర్ న్యూస్ (అక్టోబర్ 15): నిషేధిత భూముల జాబితా (22-ఏ) నుంచి భూములను తొలగించే ప్రక్రియ కోసం రూ.5 లక్షలు లంచం డిమాండ్ చేసి, తొలి విడతగా రూ.2.50 లక్షలు స్వీకరిస్తుండగా కీసర తహసీల్దార్‌ కార్యాలయానికి చెందిన డిప్యూటీ తహసీల్దార్‌ సహా ముగ్గురు ఏసీబీ అధికారులకు పట్టుబడ్డారు. గురువారం కీసర తహసీల్దార్‌ కార్యాలయంలో జరిగిన ఈ దాడికి సంబంధించిన వివరాలను ఏసీబీ రంగారెడ్డి సెంట్రల్‌ జోన్‌ డీఎస్పీ ఎ.పి. ఆనంద్ కుమార్ వెల్లడించారు. ఏసీబీ డీఎస్పీ తెలిపిన వివరాల ప్రకారం.. బాధితుడి తల్లి, కుటుంబ సభ్యుల పేరిట ఉన్న వ్యవసాయ భూములు రిజిస్ట్రేషన్‌ చట్టంలోని సెక్షన్‌ 22-ఏ కింద నిషేధిత జాబితాలో ఉన్నాయి. వాటిని జాబితా నుంచి తొలగించి సంబంధిత ప్రక్రియ పూర్తి చేసేందుకు కీసర డిప్యూటీ తహసీల్దార్‌ ఆమనగంటి సందీప్ కుమార్ రెడ్డి (ఏఓ-1) రూ.5 లక్షలు లంచం డిమాండ్ చేసినట్లు ఆరోపణలు ఉన్నాయి. ఆయన ఆదేశాల మేరకు, వీఆర్వో నన్నూరి విజయ్ కుమార్ రెడ్డి (ఏఓ-3) ప్రోద్బలంతో ప్రైవేటు వ్యక్తి కావలి బాలకృష్ణ గురువారం బాధితుడి నుంచి రూ.2.50 లక్షలు స్వీకరించినట్లు ఏసీబీ అధికారులు తెలిపారు. లంచం సొమ్ము స్వీకరించిన వెంటనే దాడి చేసిన ఏసీబీ అధికారులు బాలకృష్ణ వద్ద నగదును స్వాధీనం చేసుకున్నారు. ఈ కేసులో డిప్యూటీ తహసీల్దార్‌ సందీప్ కుమార్ రెడ్డి, వీఆర్వో విజయ్ కుమార్ రెడ్డి, ప్రైవేటు వ్యక్తి బాలకృష్ణలను అరెస్ట్ చేసి నాంపల్లిలోని ఏసీబీ ప్రత్యేక కోర్టులో హాజరుపరుస్తున్నట్లు డీఎస్పీ వెల్లడించారు. కాగా, నెల రోజుల వ్యవధిలోనే కీసరలో మరో ఏసీబీ దాడి జరగడం స్థానికంగా చర్చనీయాంశమైంది. గత సెప్టెంబర్‌ 17న కీసర పోలీస్‌ స్టేషన్‌కు చెందిన సీఐ, ఎస్‌ఐలు లంచం తీసుకుంటూ ఏసీబీకి పట్టుబడిన ఘటన మరువకముందే రెవెన్యూ శాఖకు చెందిన అధికారులు పట్టుబడటంతో కలకలం రేగింది. ప్రభుత్వ అధికారులు ఎవరైనా లంచం డిమాండ్ చేస్తే భయపడకుండా ఏసీబీ టోల్‌ ఫ్రీ నంబర్‌ 1064 కు ఫిర్యాదు చేయాలని, ఫిర్యాదుదారుల వివరాలను గోప్యంగా ఉంచుతామని డీఎస్పీ ఆనంద్ కుమార్ సూచించారు.
