రెడ్‌క్రాస్ సేవల విస్తరణకు అండగా ఉంటాం - పల్లె గంగారెడ్డి

సూర్య, ఆర్మూర్ : రెడ్‌క్రాస్ సొసైటీ సేవలను గ్రామగ్రామాన విస్తరించి, రక్తదానంపై ప్రజల్లో అవగాహన పెంపొందించాలని జాతీయ పసుపు బోర్డు చైర్మన్ పల్లె గంగారెడ్డి పిలుపునిచ్చారు. రెడ్‌క్రాస్ సొసైటీ ఎన్నికల్లో విజయం సాధించి సభ్యుడిగా ఎన్నికవడంతో పాటు రాష్ట్ర కౌన్సిల్ మెంబర్‌గా నియామకమైన జెస్సు అనిల్‌కుమార్‌ను ఆర్మూర్ మండలం  అంకాపూర్‌లో శాలువాతో సన్మానించి అభినందించారు.ఈ సందర్భంగా పల్లె గంగారెడ్డి మాట్లాడుతూ గ్రామీణ ప్రాంతాల్లో రక్తదాన అవగాహన సదస్సులు, రక్తదాన శిబిరాలు నిర్వహించాలని సూచించారు. యువతతో పాటు రైతులను కూడా ఈ కార్యక్రమాల్లో భాగస్వాములను చేసి, స్వచ్ఛంద రక్తదానంపై చైతన్యపరచాలన్నారు. అత్యవసర సమయాల్లో రక్తం అవసరమైన వారికి సకాలంలో సహాయం అందేలా రెడ్‌క్రాస్ సొసైటీ కృషి చేయాలని పేర్కొన్నారు.రెడ్‌క్రాస్ సేవల విస్తరణకు జాతీయ పసుపు బోర్డు చైర్మన్‌గా, భారతీయ జనతా పార్టీ తరఫున తనవంతు సహాయ సహకారాలు అందిస్తానని పల్లె గంగారెడ్డి హామీ ఇచ్చారు. నిజామాబాద్ ఎంపీ ధర్మపురి అర్వింద్ సహకారం కూడా ఉంటుందని తెలిపారు. రాష్ట్ర కౌన్సిల్ మెంబర్‌గా బాధ్యతలు చేపట్టిన జెస్సు అనిల్‌కుమార్ ప్రజాసేవా కార్యక్రమాలను మరింత సమర్థవంతంగా ముందుకు తీసుకెళ్లాలని ఈ సందర్భంగా తెలిపారు.