రైతులకు ఇచ్చిన హామీలను వెంటనే నెరవేర్చాలి 24 గంటల నాణ్యమైన విద్యుత్‌ సరఫరా చేయాలి.. తహసీల్దార్‌కు భారతీయ కిసాన్‌ సంఘ్‌ వినతి
కొండాపూర్‌;కాంగ్రెస్ ప్రభుత్వం రైతులకు ఇచ్చిన హామీలను నెరవేర్చాలని, వరంగల్‌ రైతు డిక్లరేషన్‌ను వెంటనే అమలు చేయాలని భారతీయ కిసాన్‌ సంఘ్‌ జిల్లా ప్రధాన కార్యదర్శి రామకృష్ణారెడ్డి డిమాండ్ చేశారు. రైతులకు రూ.2 లక్షల రుణమాఫీ చేస్తామని హామీ ఇచ్చి, ఇప్పటికీ పూర్తిస్థాయిలో అమలు చేయకపోవడం బాధాకరమన్నారు.సోమవారం కొండాపూర్‌ తహసీల్దార్‌ కార్యాలయం ఎదుట భారతీయ కిసాన్‌ సంఘ్‌ ఆధ్వర్యంలో తక్కువ వోల్టేజీ విద్యుత్‌ సమస్యతో పాటు రైతుల సమస్యలపై ఆందోళన నిర్వహించారు. అనంతరం తహసీల్దార్‌ అశోక్‌కు వినతిపత్రం అందజేశారు.ఈ సందర్భంగా రామకృష్ణారెడ్డి మాట్లాడుతూ.. వ్యవసాయానికి 24 గంటల విద్యుత్‌ అందిస్తున్నామని ప్రభుత్వం చెబుతున్నప్పటికీ, క్షేత్రస్థాయిలో రోజుకు ఎనిమిది గంటల విద్యుత్‌ సక్రమంగా అందడం లేదని విమర్శించారు. రైతులకు ఇచ్చిన హామీ ప్రకారం 24 గంటల నాణ్యమైన విద్యుత్‌ సరఫరా చేయాలని డిమాండ్ చేశారు.పంటలకు గిట్టుబాటు ధర కల్పించాలి అన్ని పంటలకు కనీస మద్దతు ధర (ఎంఎస్‌పీ)పై రూ.500 అదనంగా చెల్లించి కొనుగోలు చేస్తామని హామీ ఇచ్చారని, ప్రస్తుతం కొన్ని రకాల ధాన్యానికే పరిమితం చేస్తామని చెప్పడం ఎంతవరకు సమంజసమని ప్రశ్నించారు. భూమిలేని రైతు కూలీలకు ఏడాదికి రూ.12 వేల చొప్పున చెల్లిస్తామని ప్రకటించిన ప్రభుత్వం, మూడేళ్లకు సంబంధించిన రూ.36 వేల మొత్తాన్ని వెంటనే అందించాలని కోరారు.ఎల్‌నినో ప్రభావంతో ఏర్పడిన కరువు పరిస్థితులను సమీక్షించి, పంట నష్టాన్ని అంచనా వేసి రైతులకు తగిన నష్టపరిహారం అందించాలని రామకృష్ణారెడ్డి డిమాండ్ చేశారు. రైతుల సమస్యలను ప్రభుత్వం తక్షణమే పరిష్కరించి, వరంగల్‌ డిక్లరేషన్‌లో ఇచ్చిన హామీలను అమలు చేయాలని కోరారు.ఈ కార్యక్రమంలో భారతీయ కిసాన్‌ సంఘ్‌ మండల అధ్యక్షుడు శ్రీకాంత్‌రెడ్డి, నాయకులు దయానంద్‌, మొగులయ్య, బుచ్చయ్య, లక్ష్మణ్‌గౌడ్‌, పాండురంగారెడ్డి, శంకరయ్య తదితరులు పాల్గొన్నారు.
