రాజ్యాంగ విలువల కోసం పోరాటం కొనసాగిస్తాం...ఎమ్మెల్యే సంజీవరెడ్డి

సూర్య జాతీయ డెస్క్: ప్రజాస్వామ్య పరిరక్షణ, ఎన్నికల వ్యవస్థలో పారదర్శకత మరియు పవిత్రమైన ఓటు హక్కును కాపాడటమే లక్ష్యంగా అఖిల భారత కాంగ్రెస్ కమిటీ (ఏఐసీసీ) పిలుపు మేరకు దేశ రాజధాని ఢిల్లీలో భారీ నిరసన కార్యక్రమం ఘనంగా జరిగింది. తెలంగాణ రాష్ట్ర ముఖ్యమంత్రి రేవంత్ రెడ్డి, ఉపముఖ్యమంత్రి మల్లు భట్టి విక్రమార్క, మంత్రులు పొన్నం ప్రభాకర్, వివేక్ వెంకటస్వామి, టీపీసీసీ అధ్యక్షుడు మహేష్ కుమార్ గౌడ్‌లతో పాటు నారాయణఖేడ్ శాసనసభ్యులు డాక్టర్ పట్లోళ్ల సంజీవరెడ్డి, జహీరాబాద్ ఎంపీ సురేష్ కుమార్ శేట్కర్ మరియు సంగారెడ్డి జిల్లా కాంగ్రెస్ అధ్యక్షుడు పట్లోళ్ల చంద్రశేఖర్ రెడ్డి తదితర ముఖ్య నాయకులు ఈ నిరసనలో పాల్గొన్నారు. నారాయణఖేడ్ నియోజకవర్గం నుంచి ఢిల్లీకి తరలివెళ్లిన దాదాపు 150 మంది కాంగ్రెస్ నాయకులు, కార్యకర్తలతో కలిసి నాయకులు ప్రదర్శన నిర్వహించి కేంద్ర ప్రభుత్వ వైఖరిపై తీవ్ర స్థాయిలో ధ్వజమెత్తారు.

ఈ సందర్భంగా నారాయణఖేడ్ ఎమ్మెల్యే డాక్టర్ పట్లోళ్ల సంజీవరెడ్డి మాట్లాడుతూ.. దేశ ప్రజాస్వామ్యానికి ప్రధాన పునాది అయిన ఓటు హక్కును పరిరక్షించాల్సిన ప్రాథమిక బాధ్యత కేంద్ర ఎన్నికల సంఘంపై ఉందని స్పష్టం చేశారు. అయితే ఎన్నికల సంఘం తన రాజ్యాంగబద్ధమైన బాధ్యతలను విస్మరించి, కేంద్రంలోని అధికార బీజేపీ ప్రభుత్వ ఒత్తిళ్లకు తలొగ్గుతూ వ్యవహరించడం శోచనీయమని విమర్శించారు. ఎన్నికల ప్రక్రియ పట్ల ప్రజల్లో అనుమానాలు కలగకుండా ఉండేందుకు ఎన్నికల సంఘం తక్షణమే స్వతంత్రంగా, నిష్పక్షపాతంగా వ్యవహరించాలని డిమాండ్ చేశారు. బాధ్యతలను సక్రమంగా నిర్వహించడంలో విఫలమైన కేంద్ర ప్రధాన ఎన్నికల కమిషనర్ తన పదవికి తక్షణమే రాజీనామా చేయాలని ఆయన డిమాండ్ చేశారు.

కార్యక్రమంలో పాల్గొన్న నాయకులు, కార్యకర్తలు “ఓటు చోర్ - మోదీ హటావో, భారత్ బచావో” అనే నినాదాలతో కూడిన బ్యానర్లను ప్రదర్శిస్తూ తమ ఆందోళనను తెలిపారూ. పౌరుల ఓటు హక్కును కాపాడటం, రాజ్యాంగ విలువలను నిలబెట్టడం మరియు ప్రజాస్వామ్య వ్యవస్థను బలోపేతం చేయడం కోసం కాంగ్రెస్ పార్టీ ఎంతటి పోరాటానికైనా సిద్ధమని సంజీవరెడ్డి స్పష్టం చేశారు. ఈ కార్యక్రమంలో తెలంగాణకు చెందిన పలువురు మంత్రులు, ఎంపీలు, ఎమ్మెల్యేలు, ఎమ్మెల్సీలు, కార్పొరేషన్ చైర్మన్లు మరియు పీసీసీ, యూత్ కాంగ్రెస్, మహిళా కాంగ్రెస్ నాయకులు పెద్ద సంఖ్యలో పాల్గొని తమ నిరసనను వ్యక్తం చేశారు.