రాజకీయ కక్ష సాధింపు తోనే తప్పుడు కేసు-బిజెపి రాష్ట్ర కార్యవర్గ సభ్యుడు చల్లా నారాయణరెడ్డి

కాటారం, మేజర్ న్యూస్, తనకు ఎలాంటి సంబంధం లేని అంశంలో కక్షపూరితంగా కాటారం పోలీస్‌ స్టేషన్‌లో కేసు నమోదు చేయడం పూర్తిగా రాజకీయ కుట్రని, ఇది ప్రజాస్వామ్యాన్ని అప్రతిష్టపాలు చేయడమేనని బీజేపీ రాష్ట్ర కార్యవర్గ సభ్యులు చల్ల నారాయణరెడ్డి మండిపడ్డారు. కాటారం మండల కేంద్రంలో ఆదివారం నిర్వహించిన విలేకరుల సమావేశంలో నారాయణరెడ్డి మాట్లాడుతూ అధికార పార్టీ అండదండలతో పేదల భూములను లాక్కోవడమే కాకుండా, ప్రశ్నించిన వారిపై తప్పుడు కేసులు బనాయించడం కాంగ్రెస్ అణచివేత ధోరణికి అద్దం పడుతోందని ధ్వజమెత్తారు. గుమ్మళ్లపల్లి గ్రామానికి చెందిన గాడివి రజిత అనే మహిళ కుటుంబానికి దాదాపు 50 ఏళ్ల క్రితం ప్రభుత్వం 5.26 గుంటల సీలింగ్ భూమిని కేటాయించింది. ప్రస్తుత అధికార పార్టీ రాజకీయ బలాన్ని చూసుకుని గ్రామానికి చెందిన కొందరు నాయకులు రజితకు చెందిన ఆ భూమిని అక్రమంగా లాక్కొని దున్నుకుంటున్నారు. దీనిపై సదరు బాధితురాలు అధికారుల చుట్టూ తిరిగినా ఎవరూ పట్టించుకోకపోవడంతో, ఆవేదనతో ఒక సెల్ఫీ వీడియోను తీసి వాట్సాప్ గ్రూపుల్లో పంచుకుంది.ఈ వీడియోపై అదే గ్రామానికి చెందిన కంకణాల రఘునందన్ ఆ మహిళను బెదిరించగా, భయాందోళనకు గురైన రజిత.. రఘునందన్ భార్య స్వాతిని వ్యక్తిగతంగా దూషించింది. ఇద్దరి వ్యక్తుల మధ్య జరిగిన ఈ సివిల్ వివాదంతో తనకు ఎలాంటి సంబంధం లేకపోయినా, తానే వెనకుండి మాట్లాడించినట్లు చిత్రీకరిస్తూ కాంగ్రెస్ నాయకులు కుట్రపూరితంగా తనపై కేసు పెట్టించారని ఆగ్రహం వ్యక్తం చేశారు. తన 38 ఏళ్ల సుదీర్ఘ రాజకీయ జీవితంలో ఎన్నడూ మహిళలను కించపరిచేలా ప్రవర్తించలేదని ఆయన స్పష్టం చేశారు. కేవలం తన వ్యక్తిత్వ హననానికి పాల్పడుతూ రాక్షసానందం పొందుతున్న కాంగ్రెస్ నాయకులు ఇప్పటికైనా వక్రబుద్ధిని మానుకుని పేదలకు న్యాయం చేయాలని డిమాండ్ చేశారు.ఈ సమావేశంలో మహాముత్తారం మండల అధ్యక్షులు మేడిపల్లి పూర్ణచందర్, మలహార్ రావు మండల అధ్యక్షులు శ్రీకాంత్, జిల్లా కౌన్సిల్ మెంబర్ బొమ్మన భాస్కర్ రెడ్డి, జిల్లా మైనారిటీ మోర్చా అధ్యక్షులు రఫీ, మాజీ మండల అధ్యక్షులు బండం మల్లారెడ్డి, మండల జనరల్ సెక్రటరీ స్వామి, నాయకులు గోగుల రాజేష్, చీర్ల అశోక్ రెడ్డి, సడువలి తదితరులు పాల్గొన్నారు..
రిపోర్టర్: గోనే సుధాకర్ రెడ్డి, కాటారం, జయశంకర్ భూపాలపల్లి