ప్రతి విద్యార్థిలో భాషా, గణిత నైపుణ్యాలు పెంపొందించాలి - కలెక్టర్ కోయ శ్రీహర్ష

సూర్య - పెద్దపల్లి: విద్యార్థుల అభ్యసన సామర్థ్యాలను పెంపొందించేందుకు 100 రోజుల ప్రత్యేక కార్యాచరణను పకడ్బందీగా అమలు చేయాలని జిల్లా కలెక్టర్ కోయ శ్రీహర్ష విద్యాశాఖ అధికారులను ఆదేశించారు.
సోమవారం సమీకృత కలెక్టరేట్‌లో ప్రాథమిక పాఠశాలల ప్రధానోపాధ్యాయులకు నిర్వహించిన ఓరియంటేషన్ కార్యక్రమంలో కలెక్టర్ మాట్లాడుతూ విద్యార్థుల్లో వినడం, మాట్లాడడం, చదవడం, సృజనాత్మకంగా రాయడం వంటి భాషా నైపుణ్యాలను పెంపొందించాలని సూచించారు. తెలుగు, ఆంగ్లం, గణితంలో వెనుకబడిన విద్యార్థులను గుర్తించి ప్రత్యేక బోధన అందించాలన్నారు.
గణితంలో కూడిక, తీసివేత, గుణకారం, భాగహారం ప్రక్రియల్లో ప్రతి విద్యార్థి పూర్తి స్థాయి నైపుణ్యం సాధించేలా బోధన చేపట్టాలని తెలిపారు. రెమిడియేషన్, AXL AI, ఎఫ్‌ఎల్‌ఎన్‌ కార్యక్రమాల అమలును ఎంఈఓలు, ప్రధానోపాధ్యాయులు నిరంతరం పర్యవేక్షించాలని ఆదేశించారు. డిజిటల్ అభ్యసనంలో విద్యార్థుల నమోదు, ప్రగతిని సమీక్షించాలని సూచించారు.
అనంతరం 100 రోజుల ప్రత్యేక కార్యాచరణ క్యాంపెయిన్ పోస్టర్‌ను కలెక్టర్ ఆవిష్కరించారు. కార్యక్రమంలో డీఈఓ, అకాడమిక్ మానిటరింగ్ ఆఫీసర్ డాక్టర్ పి.ఎం. షేక్, అలోకిట్ ప్రతినిధులు, డీఆర్‌పీలు, ప్రధానోపాధ్యాయులు పాల్గొన్నారు.