ప్రకృతి ఆరాధనకు ప్రతీక బతుకమ్మ.. మేడ్చల్ కలెక్టరేట్‌లో ఘనంగా సంబరాలు
మేడ్చల్ జిల్లా ప్రతినిధి, మేజర్ న్యూస్: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ వేడుకలు మేడ్చల్–మల్కాజిగిరి జిల్లా కలెక్టరేట్‌లో శనివారం ఘనంగా నిర్వహించారు. ప్రకృతిని ఆరాధిస్తూ, మహిళా ఐక్యతను చాటే ఈ పూల పండుగలో వివిధ ప్రభుత్వ శాఖలకు చెందిన మహిళా అధికారులు, సిబ్బంది ఉత్సాహంగా పాల్గొని సంప్రదాయబద్ధంగా సంబరాలు జరుపుకున్నారు.జిల్లా రెవెన్యూ శాఖ, వైద్య ఆరోగ్య శాఖ, పౌర సరఫరాల శాఖ, భూగర్భ జల శాఖ, కీసర రెవెన్యూ డివిజనల్ అధికారి కార్యాలయాల ఆధ్వర్యంలో ఈ వేడుకలు నిర్వహించారు. రంగురంగుల పూలతో అందంగా బతుకమ్మలను పేర్చి, సంప్రదాయ పాటలు పాడుతూ మహిళలు సందడి చేశారు. దీంతో కలెక్టరేట్ ప్రాంగణంలో పండుగ వాతావరణం నెలకొంది.బతుకమ్మ పండుగ ప్రకృతితో మానవ సంబంధాన్ని చాటడమే కాకుండా మహిళల మధ్య ఐక్యత, ఆత్మీయతను పెంపొందిస్తుందని ఈ సందర్భంగా పలువురు పేర్కొన్నారు. తెలంగాణ సంస్కృతి, సంప్రదాయాల గొప్పతనాన్ని భావితరాలకు అందించడంతో పాటు ప్రకృతిని గౌరవించడం, పర్యావరణ పరిరక్షణకు ప్రాధాన్యమివ్వడం ఈ పండుగ ప్రధాన సందేశమని తెలిపారు.ఈ కార్యక్రమంలో జిల్లా రెవెన్యూ అధికారి మాలతి, లా ఆఫీసర్ చంద్రావతి, జిల్లా వైద్య ఆరోగ్య శాఖ అధికారి డాక్టర్ ఆనంద్, జిల్లా పౌర సరఫరాల అధికారి శ్రీనివాస్ రెడ్డి, డెమో వసంత, మహిళా అధికారులు సారిక ప్రియ, ప్రసన్న లక్ష్మి, సంతోష్‌తో పాటు వివిధ శాఖల అధికారులు, సిబ్బంది పాల్గొన్నారు.
