నస్పూర్ లో ఘనంగా బతుకమ్మ వేడుకలు • అలరించిన చిన్నారుల సందడి

సూర్య, మంచిర్యాల జిల్లా ప్రతినిధి : నస్పూర్ టౌన్‌లో బతుకమ్మ వేడుకలు అత్యంత వైభవంగా, సంప్రదాయబద్ధంగా జరిగాయి. తెలంగాణ సంస్కృతి, సంప్రదాయాలకు ప్రతీకయైన ఈ పూల పండుగలో మహిళలతో పాటు చిన్నారులు విశేషంగా పాల్గొని పండుగ శోభను మరింత ద్విగుణీకృతం చేశారు.

వేడుకల్లో భాగంగా స్థానిక మహిళలు రంగురంగుల బంతి, చామంతి, తంగేడు వంటి విధవిధాల పూలతో బతుకమ్మలను అందంగా పేర్చారు. చిన్నారులు సాంప్రదాయ దుస్తులు, ఆభరణాలు ధరించి, తమ తలలపై బతుకమ్మలను ఎత్తుకుని వేడుకల్లో ప్రత్యేక ఆకర్షణగా నిలిచారు. బతుకమ్మల చుట్టూ తిరుగుతూ పాటలు పాడుతూ ఆటలాడుతున్న చిన్నారుల సందడి ప్రతి ఒక్కరినీ అలరించింది. ఈ సందర్భంగా స్థానికులు మాట్లాడుతూ.. మన సంస్కృతి, సంప్రదాయాలను భావి తరాలకు అందించడంలో ఇటువంటి వేడుకలు ఎంతో కీలకమని, చిన్నారులు ఇంత ఉత్సాహంగా పాల్గొనడం ఎంతో సంతోషాన్ని కలిగిస్తోందని పేర్కొన్నారు. మహిళలు, చిన్నారుల భాగస్వామ్యంతో నస్పూర్ టౌన్ అంతా పండుగ వాతావరణం నెలకొంది.