నల్లకుంట శంకరమఠంలో వైభవంగా శారదా శరన్నవరాత్రులు: దుర్గాదేవిగా దర్శనమిచ్చిన శారదాంబ
నల్లకుంట , మేజర్ న్యూస్ :: నగరంలోని ప్రముఖ ఆధ్యాత్మిక కేంద్రమైన నల్లకుంట శ్రీ శృంగేరి శంకరమఠంలో శ్రీ శారదా శరన్నవరాత్రి మహోత్సవాలు అత్యంత వైభవంగా, ఆధ్యాత్మిక శోభతో కొనసాగుతున్నాయి. దేవీ నవరాత్రుల ఉత్సవాలలో భాగంగా ఆదివారం జగన్మాత శారదాంబ దుర్గాదేవి అలంకరణలో భక్తులకు దివ్య దర్శనమిచ్చారు. సింహవాహినియై, శంఖుచక్రాలు, త్రిశూలధారిణిగా తేజోమయ రూపంలో కొలువుదీరిన అమ్మవారిని దర్శించుకునేందుకు నగర నలుమూలల నుంచి భక్తులు భారీ సంఖ్యలో తరలివచ్చారు.
ఈ సందర్భంగా శంకరమఠంలో వేదపండితుల మంత్రోచ్ఛారణల నడుమ అమ్మవారికి సంప్రదాయబద్ధంగా విశేష రుద్రాభిషేకం, కుంకుమార్చనలు, చండీ పారాయణం మరియు మహా మంగళహారతి కార్యక్రమాలను శాస్త్రోక్తంగా నిర్వహించారు. లోకకల్యాణార్థం, ప్రజలందరూ ఆయురారోగ్యాలు మరియు ఐశ్వర్యాలతో వర్ధిల్లాలని సంకల్పించి ఈ విశేష పూజలు జరిపారు. భక్తుల గోత్రనామాలతో అర్చనలు జరిపి తీర్థప్రసాదాలను పంపిణీ చేశారు.
ఈ పవిత్ర పూజా కార్యక్రమంలో శంకరమఠం ధర్మాధికారి చింతలపాటి శ్రీనివాసమూర్తి, బ్రాంచ్ హెడ్ గోరుగంతు రవి తదితర మఠం ప్రతినిధులు, సిబ్బంది మరియు పెద్ద సంఖ్యలో మహిళలు, భక్తులు పాల్గొని అమ్మవారి అనుగ్రహాన్ని పొందారు.
