మంచిర్యాలలో శాంతిభద్రతలను కాపాడాలి: బీజేపీ అధికార ప్రతినిధి కస్తూరి నాగరాజు

సూర్య మంచిర్యాల టౌన్ : మంచిర్యాల నియోజకవర్గంలో గ్యాంగ్ వార్లు,బహిరంగ దాడులు, యువతలో మత్తుపదార్థాల వినియోగానికి సంబంధించిన ఆరోపణలపై సమగ్ర విచారణ జరిపించి, ప్రజలకు భద్రత కల్పించాలని బీజేపీ జిల్లా అధికార ప్రతినిధి,మంచిర్యాల మున్సిపల్ కార్పొరేషన్ 12వ డివిజన్ కార్పొరేటర్ కస్తూరి నాగరాజు డిమాండ్ చేశారు.ఈ పరిణామాలు ప్రజల్లో ఆందోళన కలిగిస్తున్నాయని, ముఖ్యంగా తల్లిదండ్రులు తమ పిల్లల భవిష్యత్తుపై ఆందోళన చెందుతున్నారని పేర్కొన్నారు.స్థానికంగా జరుగుతున్న ఆధిపత్య పోరాటాల్లో యువతను ఉపయోగించుకుంటున్నారనే ఆరోపణలపై అధికారులు నిష్పక్షపాతంగా విచారణ జరపాలని కోరారు.మత్తుపదార్థాల సరఫరా, అక్రమ విక్రయాలు, వినియోగంపై ప్రత్యేక నిఘా ఏర్పాటు చేసి, చట్టవిరుద్ధ కార్యకలాపాలకు పాల్పడే వారిపై రాజకీయ సంబంధాలతో సంబంధం లేకుండా కఠిన చర్యలు తీసుకోవాలని డిమాండ్ చేశారు.మంచిర్యాలలో తరచూ చోటుచేసుకుంటున్న గొడవలు, దాడులపై ప్రజలకు భద్రతపై నమ్మకం కల్పించాల్సిన బాధ్యత పోలీసు యంత్రాంగంపై ఉందన్నారు.శాంతిభద్రతల పరిరక్షణలో పోలీసుల పనితీరుపై ఉన్నతాధికారులు సమీక్ష నిర్వహించాలని,విధుల్లో నిర్లక్ష్యం లేదా అవినీతికి సంబంధించిన ఆధారాలు లభిస్తే విచారణ జరిపించాలని కోరారు.అవసరాన్ని బట్టి పోలీసు అధికారుల బదిలీలను పరిశీలించి, సమర్థత, నిజాయితీ, జవాబుదారీతనానికి ప్రాధాన్యత ఇవ్వాలని సూచించారు.