telangana
మేడ్చల్ సర్కిల్‌లో అభివృద్ధి పనులపై సిఎంసి కమిషనర్ సృజన క్షేత్రస్థాయి పరిశీలన
మేడ్చల్, మేజర్ న్యూస్:మేడ్చల్ సర్కిల్ పరిధిలో చేపట్టనున్న మౌలిక వసతుల అభివృద్ధి పనులపై సిఎంసి కమిషనర్ సృజన క్షేత్రస్థాయిలో పరిశీలన నిర్వహించారు. జోనల్ కమిషనర్, పింకేష్ కుమార్ డిప్యూటీ కమిషనర్ సుదాంష్ , ఇంజినీరింగ్ విభాగం అధికారులతో కలిసి పలు ప్రాంతాలను సందర్శించి అక్కడి పరిస్థితులను సమీక్షించారు. ప్రజలకు ఎదురవుతున్న సమస్యలను గుర్తించి, వాటి పరిష్కారానికి అవసరమైన చర్యలు తీసుకోవాలని సంబంధిత అధికారులకు సూచించారు.మేడ్చల్ బస్‌స్టాప్ వద్ద వర్షపు నీరు నిల్వ ఉండే సమస్యను పరిష్కరించేందుకు ప్రతిపాదించిన బాక్స్ డ్రెయిన్ నిర్మాణ పనులను పరిశీలించారు. ఈ ప్రాంతంలో డ్రైనేజీ సమస్యలకు శాశ్వత పరిష్కారం చూపేలా ప్రతిపాదనలను సమీక్షించి, పనుల పురోగతిపై దృష్టి సారించారు.
అనంతరం శివాజీ విగ్రహం జంక్షన్ వద్ద కొనసాగుతున్న జంక్షన్ అభివృద్ధి పనులను పరిశీలించారు. అక్కడ చేపడుతున్న పనుల స్థితిగతులను తెలుసుకుని, అవసరమైన మౌలిక సదుపాయాల కల్పనపై అధికారులతో చర్చించారు.అలాగే అభివృద్ధి చేయడానికి ప్రతిపాదించిన కేఎల్ఆర్ పార్కును సందర్శించి, స్థల పరిస్థితులను పరిశీలించారు. పార్కు అభివృద్ధికి సంబంధించి తదుపరి చర్యలపై అధికారులకు సూచనలు చేశారు.
ఈ సందర్భంగా గుర్తించిన డ్రైనేజీ సమస్యల పరిష్కారంతో పాటు ప్రతిపాదిత మౌలిక వసతుల పనులపై నిరంతర పర్యవేక్షణ చేపట్టాలని సిఎంసి కమిషనర్ అధికారులను ఆదేశించారు. డిప్యూటీ కమిషనర్ సుధాంష్ , ఇంజినీరింగ్ అధికారులు క్షేత్రస్థాయి పరిస్థితులను సమీక్షిస్తూ, సంబంధిత పనులపై తదుపరి చర్యలు తీసుకోవాలని సూచించారు. ప్రజలకు మెరుగైన మౌలిక వసతులు అందించే దిశగా అధికారులు సమన్వయంతో పనిచేయాలని స్పష్టం చేశారు.
