కోటకొండలో విద్యుత్ షాక్ తో మహిళా రైతు మృతి

నారాయణపేట, సూర్యన్యూస్ :
ప్రమాదవశాత్తు జరిగిన విద్యుత్ షాక్ తో మహిళా రైతు మృతి చెందిన సంఘటన నారాయణపేట జిల్లాలో చోటుచేసుకుంది. గ్రామస్తులు తెలిపిన వివరాల ప్రకారం.. నారాయణపేట మండలం కోటకొండ గ్రామానికి చెందిన నరసమ్మ (58) కి భర్త దస్తప్ప 20 ఏళ్ల క్రితం మృతి చెందగా, తనకు ఉన్న 5 ఎకరాల పొలంలో వరి పంట వేశారు. ఆమెకు ఇద్దరూ కుమారులు కాగా దస్తప్ప, మల్లేష్ లు ఆంధ్రప్రదేశ్ రాష్ట్రం గుంటూరు జిల్లా పరిధిలో గొర్రెలు మోయడానికి వెళ్తుంటారు. అయితే కుమారులు స్థానికంగా ఉండకపోవడంతో పంటకు నీళ్లు పెట్టడానికి నరసమ్మ వెళ్తుంటుంది. ఆ క్రమంలో మంగళవారం సైతం పొలానికి వెళ్లగా మోటారు సమీపంలో బోర్ స్టాటర్ దగ్గర ఏపుగా పెరిగి ఉన్న గడ్డిని కోస్తున్న సందర్భంలో తెగిపడిన సర్వీస్ వైర్ తాకి విద్యుత్ షాక్ కు గురైంది. అక్కడ మేకలు మేపుతున్న తిరుమలాపూర్ గ్రామానికి చెందిన కొత్తపల్లి రాములు నీళ్లు తాగడానికి బోరు దగ్గరకు వేళ్లి చూడగా ఆమె కరెంటు షాక్ గురై చనిపోయిన విషయాన్ని గమనించి మృతురాలు కుమారుడికి ఫోన్ చేసి సమాచారం అందించారు. అయితే మహిళా రైతు కుటుంబాన్ని ఆదుకోవాలని అఖిల భారత ఐక్య రైతు కూలీ సంఘం (ఏఐయుకేఎస్) జిల్లా కార్యదర్శి యాదగిరి, ఉప సర్పంచుల సంఘం మండల అధ్యక్షులు  చెన్నప్ప యాదవ్ డిమాండ్ చేశారు.
-- రాజేష్ కుమార్, సూర్య రిపోర్టర్ నారాయణపేట.