కర్జెల్లి లో నిధుల దుర్వినియోగంపై విచారణ వేగవంతం - డి ఎల్ పి ఓ హరిప్రసాద్

సూర్య, చింతలమానేపల్లి : కర్జెల్లి గ్రామ పంచాయతీ అభివృద్ధి నిధుల మళ్లింపుపై వచ్చిన ఆరోపణలతో అధికారులు విచారణను వేగవంతం చేశారు. ఇందులో భాగంగా శుక్రవారం కర్జవెల్లి గ్రామ పంచాయతీని డివిజనల్ పంచాయతీ అధికారి (డి ఎల్ పి ఓ) హరిప్రసాద్ సందర్శించి, ఆర్థిక లావాదేవీలు, క్యాష్ బుక్స్, వోచర్లను క్షుణ్ణంగా పరిశీలించారు.గ్రామానికి మంజూరైన ప్రభుత్వ నిధులను నిబంధనలకు విరుద్ధంగా ప్రైవేట్ వ్యక్తుల ఖాతాలకు మళ్లించారనే ఆరోపణలపై అధికారులు ఆరా తీశారు. నిధులు ఏయే పనులకు కేటాయించారు? ఎవరెవరి ఖాతాలకు నగదు బదిలీ అయింది? అనే అంశాలపై రికార్డులను పరిశీలిస్తూ సంబంధిత అధికారులను, సిబ్బందిని వివరాలు అడిగి తెలుసుకున్నారు. ప్రభుత్వ నిధుల దుర్వినియోగాన్ని ఎట్టి పరిస్థితుల్లోనూ ఉపేక్షించబోమని డి ఎల్ పి ఓ హరిప్రసాద్ స్పష్టం చేసినట్లు సమాచారం. విచారణలో వెల్లడయ్యే అంశాల ఆధారంగా సమగ్ర నివేదికను ఉన్నతాధికారులకు అందజేసి, బాధ్యులపై నిబంధనల ప్రకారం చర్యలు తీసుకునే అవకాశం ఉందని తెలిపారు. కర్జెల్లి గ్రామ పంచాయతీలో నిధుల లావాదేవీలపై జరుగుతున్న విచారణ స్థానికంగా చర్చనీయాంశంగా మారింది. విచారణ నివేదికలో ఏయే అంశాలు వెలుగులోకి వస్తాయి? బాధ్యులపై ఎలాంటి చర్యలు తీసుకుంటారు? అన్నది వేచి చూడాలి.