బంట్వారం వద్ద తీవ్ర విషాదం: మైనింగ్ క్వారీలో పడి కర్ణాటకకు చెందిన ఇద్దరు మృతి

బంటారం, మేజర్ న్యూస్: వికారాబాద్  జిల్లా బంట్వారం మండల పరిధిలో శుక్రవారం నాడు తీవ్ర విషాదకర సంఘటన చోటుచేసుకుంది. మండలంలోని బొపునారం గ్రామ శివారు ప్రాంతంలో ఉన్న ఒక మైనింగ్ క్వారీ నీటిలో పడి ఇద్దరు వ్యక్తులు అక్కడిక్కడే ప్రాణాలు కోల్పోయారు. ఈ ప్రమాదం స్థానికంగా తీవ్ర కలకలం రేపింది. ప్రమాద సమాచారం అందుకున్న వెంటనే చుట్టుపక్కల ప్రజలు ఘటనా స్థలానికి చేరుకుని పోలీసులకు సమాచారం అందించారు. మైనింగ్ క్వారీలు ఉన్న ప్రాంతంలో తగిన భద్రతా చర్యలు లేకపోవడం వల్లే ఇలాంటి ప్రమాదాలు జరుగుతున్నాయని స్థానికులు ఆవేదన వ్యక్తం చేస్తున్నారు.ఈ దుర్ఘటనలో మరణించిన వారిని కర్ణాటక రాష్ట్రంలోని కుంచారం గ్రామానికి చెందిన వ్యక్తులుగా స్థానిక వర్గాలు ప్రాథమికంగా గుర్తించాయి. అయితే వారు ఈ ప్రాంతానికి ఏ పనిపై వచ్చారు, అసలు ఆ మైనింగ్ క్వారీ లోపలికి ఎందుకు వెళ్ళాల్సి వచ్చింది అనే విషయాలపై ప్రస్తుతం స్పష్టత రాలేదు. సదరు వ్యక్తులు క్వారీ వద్ద నడుచుకుంటూ వెళ్తుండగా ప్రమాదవశాత్తు కాలుజారి పడ్డారా లేదా ఏదైనా ఇతర కారణాలు ఉన్నాయా అనే కోణంలో అనుమానాలు వ్యక్తమవుతున్నాయి. క్వారీ లోతు ఎక్కువగా ఉండటంతో పాటు నీరు చేరి ఉండటంతో ప్రమా తీవ్రత పెరిగి ఉంటుందని భావిస్తున్నారు.ఘటనపై సమాచారం అందుకున్న స్థానిక పోలీసులు వెంటనే బొపునారం శివారులోని మైనింగ్ క్వారీ వద్దకు చేరుకుని పరిశీలించారు. మృతదేహాలను వెలికితీసేందుకు చర్యలు చేపట్టిన పోలీసులు, వాటిని పంచనామా నిమిత్తం సమీపంలోని ప్రభుత్వ ఆసుపత్రికి తరలించేందుకు ఏర్పాట్లు చేశారు. ఈ ఘటనపై కేసు నమోదు చేసుకున్న పోలీసులు అన్ని కోణాల్లో సమగ్ర విచారణ ప్రారంభించారు. మృతుల కుటుంబ సభ్యులకు సమాచారం అందించేందుకు కర్ణాటక అధికారులతో సంప్రదింపులు జరుపుతున్నారు. ఈ ప్రమాదానికి సంబంధించిన పూర్తి వివరాలు, మృతుల గుర్తింపు వివరాలు విచారణ అనంతరం వెల్లడి కానున్నాయి.

రిపోర్టర్: శ్రీనివాస్ గౌడ్, బంటారం, వికారాబాద్ జిల్లా.